Ivanka Tramp aficyjna atrymała pasadu daradcy prezidenta ZŠA
Dačka prezidenta ZŠA Ivanka Tramp atrymała aficyjny status daradcy kiraŭnika Biełaha doma. Heta pieršy ŭ historyi ZŠA vypadak, kali bližejšy svajak kiraŭnika dziaržavy stanovicca jaho daradcam. Sioleta spaŭniajecca 40 hadoŭ zakonu, pryniatamu śpiecyjalna dla taho, kab pieraškodzić kumaŭstvu va ŭładzie, adnak na prezidenta ZŠA jaho dziejańnie nie raspaŭsiudžvajecca, piša Gazeta.ru
Reuters
Ivanka Tramp, jakaja ŭ pieryjad prezidenckaj kampanii svajho baćki była jaho pamočnicaj, ciapier atrymaje pasadu aficyjnaha daradcy prezidenta. Na hetym tydni, u sieradu, 29 sakavika, Bieły dom paviedamiŭ pra heta aficyjna.
Heta aznačaje, što ciapier dačka amierykanskaha prezidenta zmoža prysutničać na jaho sustrečach z kiraŭnictvam krainy, dla čaho budzie mieć śpiecyjalny ŭzrovień dopusku.
Ivanka Tramp zajaviła, što stała supracoŭnikam Biełaha doma, kab «prytrymlivacca pravił, jakich trymajucca ŭsie fiederalnyja słužačyja». Jak raspaviała spadarynia Tramp, jana źbirajecca pracavać na biazvypłatnaj asnovie. Praŭda, pry hetym jana adznačyła, što jaje novaja rola budzie «biesprecedentnaj».
Vypadkaŭ, kali dzieci prezidentaŭ atrymlivali aficyjnuju rolu ŭ Biełym domie, u najnoŭšaj historyi ZŠA praktyčna nie było. Adnak ekśpierty adznačajuć, što samo prezidenctva Trampa źjaŭlajecca niezvyčajnym, bo jano parušaje mnohija niapisanyja zakony prezidenckaj administracyi.
Hazieta The New York Times piša, što pryznačeńnie Ivanki Tramp na hetuju pasadu aznačaje «farmalnaje pryznańnie taho, što dla Trampa značyć łajalnaść jaho dački i ziacia». Takim čynam, ciapier prezidentu Trampu parady budzie davać šlubnaja para Tramp — Kušnier, jakaja viadomaja svaimi bolš libieralnymi pohladami ŭ dačynieńni da mihracyi i pravoŭ mienšaściaŭ, čym sam prezident ZŠA.
Da taho ž abodva źjaŭlalisia vybarščykami Demakratyčnaj partyi. Heta aznačaje, što jany zmohuć stać libieralnaj procivahaj ultrakansiervatyŭnym daradcam Trampa nakštałt Styva Benana.
Dadamo, što aficyjna zabarony na pracu svajakoŭ u Biełym domie niama, bo prezident vałodaje admysłovymi pravami pry pryznačeńni na pasady — u adroźnieńnie ad pradstaŭnikoŭ inšych halin ułady.