Za łahier bajevikoŭ vydajuć aficyjna zarehistravany patryjatyčny letnik pad Asipovičami — padrabiaznaści
Stanoviacca viadomyja detali spravy, što stała raskručvacca 21 sakavika paśla zajavaŭ Alaksandra Łukašenki ab vykryćci «łahiera bajevikoŭ» niedzie ŭ lasach «pamiž Babrujskam i Asipovičami». Paźniej u toj samy dzień byli zatrymanyja adzin ź lidaraŭ byłoha «Biełaha lehijona» Mirasłaŭ Łazoŭski, knihanoša Aleś Jaŭdacha, babrujski padarožnik-ekstremał Andrej Dundukoŭ, a taksama jašče dva byłyja «lehijonaŭcy» — supracoŭniki siłavych viedamstvaŭ.
Što śpiecsłužby mahli vydać za «łahier bajevikoŭ»? Sapraŭdy, užo bolš za dziesiać hadoŭ u Babrujsku dziejničaje vajskova-spartovy kłub «Patryjot». Jon aficyjna zarehistravany, pracuje pry Centry tvorčaści dziaciej i moładzi Leninskaha rajona Babrujska. Hety kłub admietny tym, što aproč fizičnaha raźvićcia padletkaŭ piedahohi hutaryli ź dziećmi vyklučna na biełaruskaj movie, ładzili zaniatki pa historyi krainy. Ničoha nadzvyčajnaha — zdarovy patryjatyzm.
Kožnaje leta «Patryjot» ładziŭ pierasoŭny pałatačny łahier «Bryhancina», u jakim školniki vučylisia vyžyvańniu ŭ ekstremalnych umovach — raspalvać vohnišča, hatavać ježu, być dyscyplinavanymi. Varta adznačyć, što dziaciej nabirali z sacyjalna nieŭładkavanych siemjaŭ.
Łahier «Bryhancina» kursavaŭ pa maršrucie Babrujsk — Kisialevičy — Miradzina — Syčkava — Iziumava — Jełaviki — Babrujsk. Chłopcy dahladali mohiłki ŭdzielnikaŭ Druhoj suśvietnaj vajny, akazvali dapamohu starym ludziam.
Čas ad času ŭ łahiery ładzilisia kulturnyja mierapryjemstvy. Na sajcie «Budźmy» jość nievialikaja natatka, jak da dziaciej pryjazdžali piśmieńnica Volha Babkova, a taksama bard Andrej Mielnikaŭ. Jeździli tudy i inšyja dziejačy biełaruskaj kultury.
Adznačym jašče raz, usio adbyvałasia absalutna lehalna, dazvolena. Kłub byŭ patryjatyčny, ale zusim nie ekstremiscki.
Kiravaŭ kłubam były śpiecnazaviec Mikałaj Michalkoŭ. Pa našych źviestkach, jon nie aryštavany. Ale rašuča admaŭlajecca razmaŭlać na hetuju temu.
Pryčym tut «Bieły lehijon»? Z tych redkich zdymkaŭ, što fihuravali ŭ internecie z łahiera Michalkova, možna ŭbačyć, što niekatoryja z udzielnikaŭ mieli šaŭrony «Biełaruś. Honar. Hodnaść». Takimi karystalisia aktyvisty, jakija vyjšli z «Biełaha lehijona». Ale ničoha kiepskaha i niezakonnaha ŭ takich słovach niama.
Što takoje «Bieły lehijon»? Heta patryjatyčnaja arhanizacyja, jakaja isnavała ŭ 1990-ja i spyniła svaju aktyŭnuju dziejnaść jašče na pačatku 2000-ch. U 2008 hodzie, kali adbyŭsia vybuch na stele «Minsk — horad-hieroj», mnohija eks-aktyvisty «Biełaha lehijona» prajšli praz 10-dzionnyja zatrymańni jak «padazravanyja ŭ vybuchu». U vyniku sprava suprać «Biełaha lehijona» razvaliłasia. Ciapier niechta znoŭ sprabuje vyciahnuć z šafy škilet — arhanizacyju, jakaja daŭno nie isnuje.
Pa našych źviestkach, letašni łahier pad Babrujskam aktyŭna zdymali supracoŭniki śpiecsłužb. Krynicy «NN» vykazvajuć mierkavańnie, što ŭžo tady rychtavałasia niejkaja pravakacyja.
Pakul KDB i inšyja siłavyja struktury maŭčać pra kolkaść zatrymanych, a taksama pra vystaŭlenyja abvinavačańni.
* * *
Śpis mierkavana zatrymanych udzielnikaŭ letnika «Patryjot» — 8 čałaviek
1. Hrek Illa Hienadzievič, nar. 11.11.1992 — nam. načalnika pa ideałohii ŭ Smarhonskim pamiežnym atradzie, Hrodzienskaja vobłaść.
2. Dukšt Viačasłaŭ Aleksandrovič 19.04.1992 — Marjina Horka. Śpiecnazaviec.
3. Dundukoŭ Andrej — ratavalnik respublikanskaha atrada śpiecyjalnaha naznačeńnia, praparščyk.
4. Michalkoŭ Jan, vajskoviec.
5. Łazoŭski Mirasłaŭ.
6. Jaŭdacha Aleś, handlar knihami.
7. Abramaŭ Alaksiej Anatoljevič, nar. 17.08.1979.
8. Komlik-Jamacin Andrej.
9. Paprasili nie nazyvać imia i proźvišča. Spadziajucca, što ŭziali za «kampaniju» i čałaviek «vypadkovy». Słužyć u Pamiežnych vojskach.
10. Barstok Siarhiej Piatrovič.
11. Paškievič Cimur.
Budzie dapaŭniacca.
