U Minsku asudzili dvuch udzielnikaŭ Maršu razzłavanych biełarusaŭ miesiačnaj daŭniny
Siońnia ŭ sudzie Centralnaha rajona Minska prachodzić adrazu dva sudy nad udzielnikami Maršu razzłavanych biełarusaŭ 17 lutaha. Aktyvista Aleksu Klimienku i lidara prafsajuza REP Hienadzia Fiadyniča vinavaciać va ŭdziele ŭ niesankcyjanavanym mierapryjemstvie.
Aleksa Klimienka ŭ sud nie źjaviŭsia, tamu spravu razhladali bieź jaho. Pra toje, što jon rabiŭ, raspaviadali śviedki — učastkovyja i namieśnik načalnika Maskoŭskaha RUUS Siarhiej Astafjeŭ. Jon pisaŭ rapart ab parušeńniach aktyvista.
— Zabiaśpiečvaŭ paradak na niesankcyjanavanaj akcyi. I źviarnuŭ uvahu na Klimienku, bo jon prymaŭ aktyŭny ŭdzieł u mierapryjemstvie: vykrykvaŭ łozunhi i nios płakat «Kali ty ŭžo zdochnieš, vusaty darmajed?», — rastłumačyŭ na sudzie Siarhiej Astafjeŭ.
Toje ž samaje raspaviadali i ŭčastkovyja Alaksandr Leŭšunoŭ i Arciom Dubovik. Pakolki Klimienka na sud nie pryjšoŭ, jany apaznavali jaho pa fota, jakija byli ŭ materyjałach spravy.
— Dzieści kala 19.00 17 lutaha Klimienka išoŭ z płakatam i vykrykvaŭ łozunhi «Žyvie Biełaruś!» — Raspavioŭ Alaksandr Leŭšunoŭ.
— Što było napisana na płakacie? — udakładniła sudździa Viktoryja Šabunia.
— Niešta pra zdochnieš … Nie pamiataju dakładna.
— Ci nie žadajecie paŭtarać heta? — udakładniła sudździa.
Razhlad spravy zaniało kala paŭhadziny. U vyniku Aleksa Klimienka atrymaŭ štraf u 1150 rubloŭ (50 bazavych vieličyń) za parušeńnie paradku arhanizacyi abo praviadzieńnia masavych mierapryjemstvaŭ.
Nastupnym sudździa Viktoryja Šabunia budzie razhladać spravy lidara prafsajuza REP Hienadzia Fiadyniča.
Jon źjaviŭsia na praces i rychtujecca da aryštu: uziaŭ z saboj pakiet z rečami.
Pratakoł na staršyniu prafsajuza REP skłali tolki 27 lutaha - praź dziesiać dzion paśla akcyi. Sutnaść parušeńni ŭ tym, što Hienadź Fiadynič vykrykvaŭ łozunhi «Žyvie Biełaruś!» na Kastryčnickaj płoščy.
Svaju vinu Hienadź Fiadynič nie pryznaŭ. Jon rastłumačyŭ, što na akcyju vyjšaŭ tamu, što abaraniaŭ svaich kalehaŭ. Prafsajuz sabraŭ kala 50 tysiač podpisaŭ suprać dekreta №3 i pravioŭ bolš za siemsot asabistych kansultacyj.
— Ja nie dapušču, kab pakinuli ludziej sam-nasam z hetaj prablemaj. Ja ličyŭ svaim abaviazkam vyjści na hetuju akcyju pratestu, - patłumačyŭ Hienadź Fiadynič. - Heta ŭłada vymusiła ludziej vyjści na płošču. Ich nichto tudy nie klikaŭ admysłova.
— Vy naŭmysna pajšli na akcyju? — udakładniła sudździa.
— Ja śviadoma tudy pajšoŭ. Kali b nie było mitynhu, naŭrad ci b ułada paviarnułasia tvaram da hetaha dekreta, — adkazaŭ lidar prafsajuza REP.
U hetym pracesie ŭsiaho adzin śviedka - supracoŭnik AMAPa Anton Jurevič. Druhi nie źjaviŭsia pa słužbovych pryčynach - Zachar Tarasievič daje pakazańni pa inšaj spravie ŭ inšym sudzie.
Na dumku Fiadyniča, «heta ŭłada niasie adkaznaść ŭłada za hetaje mierapryjemstva, tamu što nie zdoleła svoječasova adreahavać na prablemu».
— Nie maja vina ŭ tym, što ja parušyŭ zakon, a ŭłady. My i dalej budziem vychodzić na vulicu, kali nichto nie budzie vyrašać našy prablemy. Tolki tady my budziem žyć hodna, — źviarnuŭsia Hienadź Fiadynič da sudu.
Advakat Vadzim Mušynski paprasiŭ spynić vytvorčaść pa spravie, pakolki ŭ dziejańniach Fiadyniča niama składu pravaparušeńnia. A svabodny ŭdzieł u mirnych akcyjach pratestu harantavany Kanstytucyjaj.
Sudździa pryniała rašeńnie aštrafavać na 50 bazavych — 1150 rubloŭ.
