Kazačnaja historyja: chłopiec zastaŭsia na Novy hod zusim biez hrošaj i naškodziŭ doma, ale znajšoŭ vyjście i za viečar zarabiŭ 30$
Dziŭnuju historyju, što adbyłasia na Novy hod u Minsku, abmiarkoŭvaje biełaruski instahram.
Nieviadomy chłopiec chadziŭ pa Minsku z pryhoža azdoblenaj palicaj prosta na hrudziach i pradavaŭ piečyva z pažadańniami.
Ludzi achvotna kuplali, fotkalisia z chłopcam, vykładali fota ŭ internet
«Našu Nivu» zacikaviła historyja, i my pierakažam jaje vam.
Sprava ŭ tym, što na Novy hod 19-hadovy artyst Daniła naškodziŭ doma, raźbiŭšy vazu, čym strašna raźjušyŭ maci.
Pierad tym jon chacieŭ paprasić u jaje hrošaj, jakija ŭ jaho skončylisia ad słova zusim, ale paśla takoha zalotu pazyčać užo nie vypadała.
Daniła sieŭ dy pačaŭ dumać, jak vybłytacca ź ciažkaj situacyi.
Jak skazaŭ chłopiec «Našaj Nivie», jon takoje praktykuje: maŭlaŭ, kali jość prablema, to treba na hadzinku na joj zasiarodzicca, i rašeńnie pryjdzie.
I rašeńnie pryjšło — artyst prydumaŭ niezvyčajny sposab chutka zarabić.
«Ja viedaŭ, što možna pradać ci svaje pasłuhi, ci štości materyjalnaje. Byli samyja roznyja varyjanty, ale ja spyniŭsia na piečyvie — piečyvie z pradkazańniami».
Heta taki kitajski pačastunak, kali ŭ piečyva zakładajucca papierki z tekstam i, kab jaho pračytać, treba razłamać ci źjeści piečyva.
Z taho, što było doma, Daniła pačaŭ hatavać — recept znajšoŭ u internecie.
Daniła vykładaŭ praces vyrabu ŭ svoj instahram.
«Zrabić heta adno, ale jašče treba było niejak aformić, kab zavabić ludziej. Było b niepryhoža ŭsio zvalić u kuču, kab kožny rukami braŭ. Treba cyvilny vyhlad. Ja ŭziaŭ karobku ad navušnikaŭ «Soni», prymajstravaŭ da jaje šnur ad parvanaj skakałki, zrabiŭ nadpis «Piečyva», vyrazaŭ na viečku z padvojenym dnom «2017», zatym zakleiŭ prarechi kalarovymi vokładkami, jakija źniaŭ z padručnikaŭ brata, i zamacavaŭ unutry lichtaryk dla padśvietki. Syšło dźvie hadziny», — apisaŭ praces Daniła.
Dalej chłopiec pajechaŭ u centr, ale transpart chadziŭ kiepska, a ŭ chłopca byli hrošy tolki na adzin kvitok aŭtobusa.
Ad doŭhaha čakańnia jon paprasiŭsia ŭ maršrutku, prapanavaŭšy kiroŭcu zavieźci jaho za adno piačeńnie z pradkazańniem.
Toj, maŭlaŭ, zaśmiajaŭsia i pahadziŭsia.
Dajechaŭšy, chłopiec uklučyŭ zahadździa padrychtavanuju kałonku sa śviatočnaj muzykaj i pačaŭ prapanoŭvać ludziam piačeńnie pa canie 50 kapiejek za adno.
«Zvyčajna ja prosta padychodziŭ i kazaŭ «piečyva z pradkazańniami na 2017 hod», ci «mahičnaje pradkazańnie, kuplajcie». A pradkazańni byli roznyja. Niekamu traplałasia «nikomu nie dadziena viedać budučyniu». Ludzi śmiajalisia, niekatoryja prasili pastajać pobač, pakul jany nie źjaduć dy nie pračytajuć», — raskazaŭ nam chłopiec.
«Ale niepryjemna ździviła tolki adno. Moža nie ździviła, a adznačyŭ dla siabie — kali ja padychodziŭ da ludziej z Savieckaha Sajuza, skažam tak, to jany vielmi mocna advaročvalisia. Kazali, što nie chočuć, što tolki nie heta, navošta im — voś tak. A moładź staviłasia vielmi pryjazna».
U vyniku chłopiec pradaŭ kala 120 štuk — niedzie 30 ź ich prosta padaryŭ ludziam z kartačkami, bo kaža, što nie moh prosta syści ad tych, kamu ŭžo prapanavaŭ niezvyčajnaje piačeńnie.
U vyniku chłopiec zarabiŭ za viečar 60 rubloŭ i na nastupny dzień kupiŭ u chatu novuju vazu i prosta novy kubak dla maci.
