Jak Bykaŭ i Baradulin vinšavali adzin adnaho z Kaladami i Navahodździem

Ryhor Baradulin i Vasil Bykaŭ.

* * *

[1960]

Z novym,
vialikim,
značnym,
tvorčym
hodam, poŭnym udałych vobrazaŭ, dumak, pośpiechaŭ.
Ščaślivaj darohi ŭ budučaje, Hryša!

Tvoj Vasil.

* * *

[1963]

Darahija Baraduliny,

z Navahodździem Vas! Z novymi vieršami, novymi dziećmi, novymi radaściami! Kali čaho mała — daj boh i taho!

Vasil-hrodzienski.

* * *

[1966]

Darahija Hryša, Vala, Iłonka.

Z Novym hodam!

Daść boh dažyviem, kali budziem vinšavać biez papravak. [Typahrafski nadpis na paštoŭcy pa-rasiejsku «S novym hodom!» V. Bykaŭ vypraviŭ na biełaruski — «Z novym hodam!». — S. Š.]

Vaš Vasil B.

* * *

[1967]

Darahija Hryša, Vala, Iłonka!

Vinšuju Vas z Novym, lepšym, 1968-m! Daj boh usim Vam u im dobraha zdaroŭja i ščaścia.

Niachaj Vam u Novym
dobra pišacca,
— // — žyviecca,
— // — kachajecca!

Sa ščyraściu V. Bykaŭ.

* * *

[1981]

Darahija Hryša, Vala, Iłonka,

z Novym hodam vas i novym ščaściejkam. Ale kab i staroje nie minałasia — u siamiejcy, u rabocie, u siabroŭstvie.

I — budźcie zdarovieńkija.

Vašy V. i I. Bykavy.

* * *

[1984]

Darahija Valička, Iłonka i Ryhorka!

Sa śviatam vas, novym ščaściem i dobrym zdaroŭjem, a taksama — sa starymi siabrami, jakija vas zaŭždy lubiać i padpisvajucca tut:

Iryna i Vasil.

* * *

Lubyja, rodnyja, nieacennyja Iryna Michajłaŭna i Vasil Uładzimiravič!

Usioj našaj siamjoj vinšujem vas z Novym hodam!

Chaj vam zdarovicca, ščaścić, tvorycca!

Chaj radaść nie abminaje vašaj haspody!

Vašyja Ryhor, Vala, Iłona Baraduliny.

Minsk, 87.

* * *

Vasilu Bykavu
Miensk, 90
Navahodniaje

Pojduć z časam partpadbrechičy na ŭtyl,
Zastaniecca słova Bykaŭskaje, kołkaje.
Dyk viasłuj u viek nastupny, Pan Vasil,
Dvuchvasilna, dvuchviasiolna, dvuchviasiołkava!

Z Novym paniu Irynu!

Ryhor

* * *

[Biez daty]

Ščodry viečar, ščaślivy viečar,
Samotny viečar, šanoŭny pan.
Haryć na kucie paŭtuzin śviečak —
Chrystos nam śviecić i honić zman.

Chrystosu słava i kvołym słava,
Ciarpliŭcam mocy ŭ ciarpieńni dam,
Hałodnym — chleba, ubohim viery,
Žyćcia i ščaścia — usim ludziam.

Vasil Bykaŭ, paeta

* * *

[1992]

Miłyja i darahija našy Valička i Hryša, z Novym hodam vas!

Chaj jon pryniasie nam zdatnaje zdaroŭje i trošačku nadziei, bieź jakoj žyć tak ciažka. A ŭžo i my jamu niečym adździačym, hetamu dziaŭblivamu pieŭniu…

Abdymajem,

vašyja Vasil i Iryna B.

* * *

Rodnyja, darahija
Iryna Michajłaŭna, Vasil Uładzimiravič!

Z Novym hodam! Ščaścia!

I ŭ Novym hodzie Vasilu
Šanoŭniejšamu Bykavu
Chaču skazać svajo lublu.
Niachaj hadzińnik cikaje,
Hadzińnik viečnaści —
Na im
Čas Bykaŭski paznačany.
Svaim
Pryznany ŭ śviecie ŭsim
Vialiki syn Ušaččyny!

Ryhor

1992

* * *

[Biez daty]

Ryhorka, miły moj čałaviek!

Vinšuju ciabie, abdymaju, vielmi žadaju tabie ščaściejka i zdaroŭja. Dla siabie, svaich rodnych, siabroŭ i harotnaje našaj Biełarusi.

Budź — mnoha, mnoha!

Tvoj Vasil, a taksama Iryna.

* * *

[1997]

Miłyja i darahija Hryša i Valička!

Z Navahodździem vas i sa śviatymi Kaladami. Chaj i nadalej śviecić nam jasnaja zoračka Biełarusi, daje zdaroŭje, natchnieńnie i n a d ź je ju.

Sa ščyraściu,

Vasil i Iryna.

* * *

Rodny Vasilu!

Siońnia ŭ Kaladny viečar dziakavaŭ Bohu za ŭsio. Uzhadvaŭ, viadoma, ciabie. Škadavaŭ, što nie mahu pačuć hołas tvoj, jakim duša tvaja ščyraja pramaŭlaje. Za kaladnym stałom usioj našaj nievialikaj siamiejkaju žadali tabie zdaroŭja, ščaślivaha viartańnia.

Chaj zorka Viflijema nia haśnie ŭ tvajoj dušy! Chaj viasioła kaladuje nastroj tvoj! Chaj, jak prodki kazali, zdaroŭje tvajo budzie jak kaladny lod! […]

Abdymaju!

Tvoj Ryhor.

* * *

Rodny Vasilu!

Kalady hrukajucca ŭ chatu. Maroz vuhły praviaraje, viatry absiah damiatajuć. Na dušy adpaviedna maraziana, ale kramiana.

Siońnia samaja daŭhaja noč. (Darečy, heta symbalična, što naradziŭsia jakraz adzin z samych žachotnych vusatych. [21 śniežnia — dzień narodzinaŭ I. V. Stalina, hienieralnaha saktara CK UKP(b), arhanizatara masavych represij u SSSR. — S. Š.])

Zaŭtra ŭžo dzień pojdzie ŭhoru. I nastroj za im pacianiecca.

Z Kaladami ciabie, bracie! Kramianaści tabie j mocy duchu!

Pakłon ad usich maich, ad usich biełarusaŭ tabie j vialmožnaj spadaryni Irynie Michališcy!

Abdymaju!

Tvoj Ryhor.

LIST DVACCAĆ PIATY
ź Miensku

Iduć spakojna chałady.
Na plečy ŭśkinuŭšy zaviei.
Ad ichniaj vuścišnaj chady
Duša vady nijakavieje.
Zrabiŭsia biełym marny prach,
Zasnuła niemata hłuchaja.
Z hadoŭ malečych
Pieršy strach
Siabie zabytaha hukaje.

Nia vydaść sens
Svaich kładoŭ.
Siabie ratuje stomaj praca.
Usio,
Što vyjšła z chaładoŭ,
Pavinna ŭ chałady viartacca.

21.12.2000

* * *

Rodny Vasilu!

Z Novym hodam, z novym stahodździem, z novym tysiačahodździem!

A kankretna ź rodnaj ziamielki — z novym śnieham, ź pieršaj zaviejaj! Niachaj zavieja hetaja zamiacie ŭsie čornyja ślady našych złośnikaŭ, niachaj raźmiacie biełuju darohu našaj krainie da voli, da śviatła! […]

Rodny bracie!

Z Novym hodam! Chaj novaje tysiačahodździe pałahadnieje j praśvietlicca!

Nizki pakłon tabie j vialmožnaj spadaryni Irynie Michališcy ad usioj našaj siamji, uklučajučy Mirona!

Abdymaju!

Tvoj Ryhor.

LIST DVACCAĆ VOŚMY
ź Miensku

Zavieja śvietła zamiataje
Zmrok i ŭharbiełyja kłady,
Jak i niabačanaja taja,
Što našy zamiacie ślady.

Ad žarści biełaje zharaje
Zavieja —
Łastaŭka zimy.
Za letuciennymi harami
Ślazu zalevy
Śniać hramy.

Prystały śviet,
Jak chleb, čarśćvieje.
Śnieh zasynaje na latu.
Žvavieje, rupicca zavieja —
Z dušy źmiataje čarnatu.

1 studzienia, 2001

* * *

Rodny Vasilu!

Uspaminaju ciabie štodnia. Na Kalady pišu tabie takija radki:

LIST DVACCAĆ DZIEVIATY
ź Miensku

Maroz — lutun,
Hrom — hrukatun,
Spačnicie, adtajcie,
Da nas zavitajcie.
I vy, dziadočki, chadzicie
I niepamianionych z saboju viadzicie, —
Mama zaprašaje jeści kućciu.
I, zatrymaŭšysia na imhnieńnie
Niedzie ŭ błakicie,
Radujecca duša žyćciu.

Na kućciu, na Dziady,
Źbirajucca
Vajavody kryvickaha rodu,
Kab nasłać łahodu
Na niezapynienyja hady.

Kalada-kaladzica,
Kramianaja maładzica,
Maładzicca,
Kaladzicca,
Hrejecca kala śviat.
I lod ladzicca,
I ładzicca ład.

Zima ŭ nas biarecca, zdajecca, pa-haspadarsku. Savieckaja presa lubiła prykazku: mnoha śniehu — mnoha chleba.

Jak u nas nakont hetaha, viedaješ.

Chocacca ŭ Vušaču, dzie j śnieh śniažysty j čysty, dzie j nieba ŭ zorkach pa jabłyku, dzie Mama zaprašaje ŭsich za kaladny stoł. Uspaminu tam dobra.

Pakłon ad usich biełarusaŭ, u kaho dušy nia vystudziŭ sivier, ad usich maich tabie, bracie, j vialmožnaj spadaryni Irynie Michališcy!

Abdymaju.

Tvoj Ryhor.

2001

Miensk

* * *

Rodny Vasilu!

Nas čakajuć našyja Kalady tam, dzie pieršy raz my huknuli ich.

Samaje ciopłaje śviata, bo zaŭsiahdy ŭspaminajecca, bo kožny raz malečyja vočy šukaju ŭ jaślach z łasiejšym sienam Zbaŭcu.

Z Kaladami ciabie, samy rodny!

Z Kaladami vialmožnuju Irynu Michališku.

LIST SORAK ČAĆVIERTY
ź Miensku

Na dvary i na dušy zima.
Zainiełyja kaladoŭščyki,
Kaladujem,
Pakul jon doŭžycca,
Viek naš,
Dzie spakoju niama.

Poŭniacca kaladna miachi
Žalem,
Skruchami,
Zaviruchami.
Pniami bosymi ściužu słuchaje
Paniaviečany bor hłuchi.

Ścišna
Našym kaladam biaz nas
I ŭ Byčkach,
I na Vierasovačcy,
Što kuhikała soŭka sovačcy,
Pomnić
Času nia maje čas.

Chodziać,
Kab abminuć kłady,
Statki ŭzhadak
Niabiesnaj pašaju…
Kab sahrelisia dušy našyja
Nas viartajuć damoŭ chałady.

24 sniežania, 01

* * *

Rodny Vasilu!

Čuvać užo, jak kapycić umierzły doł hod Kania. Biełarusi Boh pasyłaje skakuna, dy niama vieršnika. Moža ŭžo naradziŭsia j raście. Chaj by!

Z Novym hodam ciabie, kryvič z kryvičoŭ, z Novym hodam spadaryniu Irynu Michališku.

LIST SORAK PIATY
ź Miensku

Čym jon novy,
Nastupny hod?
Radaść novaja,
Novy smutak,
Ci byvajuć jany?
Kamu tak
Bačyć doliła ichny prychod?

Novy hod —
Značyć znoŭ nanoŭ
Pieramieluć staroje hora,
Pryhadaŭšy nazaŭtra ŭčora,
Kamiani niaŭmolnych młynoŭ.

Pa sabie
Ci pa ŭsich uzdych
Viečnaści.
Novy jon ci čarhovy,
Viedajuć ciarplivyja słovy.
Zapytajma ich,
Maładych!

27 śniežania, 01

* * *

Rodny Vasilu!

Voś i padkaciłasia chudarlavaja dvojka da dvuch žyvatastych nuloŭ. Dźvie dvojki — čaćviorka. A ličba čatyry — sama tryvałaść. Moža vytryvajem.

Chaj novy hod dadaść tabie mocy!

Pakłon vialmožnaj spadaryni Irynie Michališcy!

LIST SORAK ŠOSTY
ź Miensku

Vidać, z uspaminaŭ źniščanych puščaŭ
Viartacca śniahi
Na kruhi svaje pačali.
Dzień małady
Nos chitruščy spluščyŭ,
Prypaŭšy da nizkaj šybiny niebaśchiłu.
Pryciskaju svoj nos,
Kaliści kirpaty,
Da niezabytaje šybiny
U zainiełym halli
I hrejusia choładam maminaj chaty,
Žmuračysia ad zichotkaj dryhotki
Zavirušnaha pyłu,
Jaki dahetul dryžyć…

0

0

0

0

0

0