Siabra žury «Listapadzika»: Praktyku prymusovaha zahonu dziaciej u kinazały para spyniać
Praktyku prymusovaha zahonu dziciačaha hledača ŭ kinazały para spyniać, zajaviła siabra žury konkursu filmaŭ dla dziciačaj i junackaj aŭdytoryi «Listapadzik», biełaruskaja piśmieńnica Jaŭhienija Pastarnak 12 listapada na sustrečy, pryśviečanaj vynikam XXIII Minskaha mižnarodnaha kinafiestyvalu «Listapad».
Piśmieńnica zaznačyła drennuju arhanizacyju pracy arhkamiteta fiestyvalu z ustanovami adukacyi. Na jaje dumku, mienavita niaŭzhodnienaść dziejańniaŭ pasłužyła pryčynaj skandalnaj situacyi, što skłałasia 11 listapada na pakazie ŭ ramkach «Listapadzika» karciny «Bramnik», jakaja raspaviadaje pra padletkavuju ciažarnaść. U pryvatnaści, stała viadoma ab abureńni nastaŭnikaŭ, jakija pryviali na sieans piacikłaśnikaŭ, tym, što dzieciam pakazvajuć film z uzrostavym abmiežavańniem 14+. Pakaz karciny byŭ spynieny.
«Nastaŭniki skandalać, dzieci skandalać, atmaśfiera ŭ zale nie vielmi pryjemnaja. Było baluča i kryŭdna za kino, — skazała Pastarnak. — Jašče adzin prykład, kali na niamiecki film z subcitrami pryviali pieršakłaśnikaŭ. Heta niesumlenna ŭ adnosinach da ich, bo jany nie ŭ stanie pračytać subcitry z toj chutkaściu, ź jakoj jany iduć».
Jana zaklikała arhanizataraŭ fiestyvalu admovicca ad «pryhnanych u kinateatry kłasaŭ». «Heta prosta ahidnaść, — skazała piśmieńnica. — Vy ž nie zhaniajecie pa raznaradcy rabočych z zavodu na pakazy asnoŭnaha konkursu, i ź dziciačymi filmami tak pastupać nielha, heta niesumlenna. Jašče bolš niesumlenna, kali los «Listapadzika» vyrašaje kolkaść pryhnanych u zału dziaciej».
Na jaje dumku, fiestyvalu treba supracoŭničać nie z rajonnymi ŭpraŭleńniami adukacyi, a niepasredna sa škołami, z razumnymi dyrektarami.
U svaju čarhu dyrektar MMKF «Listapad» Anžalika Krašeŭskaja zaznačyła: «Nam zaŭsiody paprakali, što fiestyval nie traplaje na školnyja vakacyi. Adpaviedna kinateatry nie mohuć zabiaśpiečyć hledača, i dla ich heta trahiedyja. Kab nie było pustych załaŭ, kamitet adukacyi abaviazvaje škoły naviedvać sieansy. Atrymlivajecca, kinateatry strachujucca, a piedahohi navat nie zahladajuć u kinaprahramu».
Jana padkreśliła, što takim ža čynam dzieci naviedvajuć teatry i inšyja kulturnyja mierapryjemstvy. Pavodle jaje słoŭ, pytańnie ab tym, jakim čynam matyvavać siamiejnyja pachody ź dziećmi ŭ kino, vielmi składanaje. Na jaje dumku, kali b na film «Bramnik» pryviali staršakłaśnikaŭ, heta było b bolš darečy, cikava i važna, tamu što «nie kožny baćka razmaŭlaje sa svaimi dziećmi, jakija stalejuć».
