Kanadski alimpijec: Kakain trapiŭ u mianie padčas seksu
Čempijon śvietu pa skačkach z šastom Šon Barbier nie parušyŭ spartyŭnych praviłaŭ i mieŭ prava vystupać na Alimpijadzie ŭ Rya-de-Žaniejra, niahledziačy na stanoŭčuju dopinh-probu na kakain. Jak zajaviła Fiederacyja lohkaj atletyki Kanady, narkotyk trapiŭ u arhanizm spartoŭca bieź jaho viedama.
U vypadku pryznańnia vinavatym Barbieru pahražała dyskvalifikacyja z boku Kanadskaha centra pa etycy ŭ sporcie terminam da dvuch hadoŭ. Kamisii, jakaja razhladała jahonuju spravu 5 žniŭnia, jon paviedamiŭ, što narkotyk trapiŭ u jaho arhanizm praz pacałunak.
22-hadovy atlet raspavioŭ, što ŭviečary napiaredadni nacyjanalnaha adboračnaha turniru Alimpijady-2016 jon raźmiaściŭ ankietu na sajcie znajomstvaŭ u internecie, dzie napisaŭ, što šukaje vypadkovaj suviazi ź dziaŭčynaj «čystaj ad narkotykaŭ i chvarob».
Jak vyśvietliłasia ŭ chodzie razboru, Barbier šukaŭ seksu dla taho, kab źniać niervovaje napružańnie. Žančyna, ź jakoj jon mieŭ kantakt, patłumačyła, što ŭžyvała narkotyk pierad spatkańniem, a padčas ich sustrečy pacałavała atleta niekalki razoŭ, nie prainfarmavaŭšy jaho pra toje, što prymała kakain.
Jaho sprava razhladałasia ŭ dzień adkryćcia Alimpijskich hulniaŭ u Rya, a rašeńnie było vyniesiena šaściu dniami paźniej, 11 žniŭnia. «Ja ni na adno imhnieńnie nie moh dapuścić navat addalenaj dumki, što zmahu zabrudzicca kakainam», — paviedamiŭ Barbier u svajoj zajavie.
Niezaležny arbitraž, jaki razhladzieŭ hety vypadak, pryjšoŭ da vysnovy, što ŭ dziejańniach spartsmiena nie było ni namieru, ni złačynnaj niadbajnaści. Fiederacyja lohkaj atletyki Kanady vitała hetaje rašeńnie, nazvaŭšy jaho spraviadlivym i pradumanym.
Jak raspavioŭ advakat spartsmiena, sudmiedekśpierty pryjšli da vysnovy, što jon nie moh pryniać hetak małuju dozu narkotyku naŭmysna.
Barbier vystupaŭ na Alimpijadzie 15 žniŭnia, i pa jaho pryznańni, hulni stali dla jaho niaprostym vyprabavańniem.
Budučy čempijonam śvietu 2015 hoda i bronzavym miedalistam hulniaŭ Sadružnaści ŭ 2014 hodzie, 22-hadovy spartsmien byŭ adnoj z hałoŭnych alimpijskich nadziej svajoj krainy. Tym nie mienš u Rya jamu ŭdałosia zaniać tolki 10-je miesca.
Anałahičny vypadak mieŭ miesca z francuzskim tenisistam Ryšaram Haskie. Jon byŭ adchileny ad spabornictvaŭ na 12 miesiacaŭ, adnak u 2009 hodzie zabarona była źniataja, paśla taho jak spartsmienu ŭdałosia dakazać, što zabaronienaje rečyva patrapiła ŭ jaho arhanizm praz pacałunak.
