U Pucina ŭ hałavie
Ździviła absalutnaja ścipłaja, abyjakavaja navat z boku aficyjoznych ŚMI reakcyja na navinu pra toje, što VVP zaniaŭ pasadu kiraŭnika cajuznaj dziaržavy. Navat pra tur Milinkieviča pa pravincyi hazetčyki pišuć bolš. Adna nadzieja ŭ fanataŭ Sajuzu: ŭ hałavie Uładzimira Uładzimiraviča kruciacca siońnia absalutna inšyja dumki. Feljeton Lolika Uškina.
Ździviła absalutnaja ścipłaja, abyjakavaja navat z boku aficyjoznych ŚMI reakcyja na navinu pra toje, što VVP zaniaŭ pasadu kiraŭnika Sajuznaj dziaržavy. Navat pra tur Milinkieviča pa pravincyi hazetčyki pišuć bolš. Adna nadzieja ŭ fanataŭ Sajuzu: ŭ hałavie Uładzimira Uładzimiraviča kruciacca siońnia absalutna inšyja dumki. Feljeton Lolika Uškina.
Voś i ŭsio. Finita ła kamedyja. Jak kazaŭ Astap Bender — «zbyłasia mara idyjota». Ja kiraŭnik Sajuznaj Dziaržavy, staršynia Sajuznaha Ministerstva!
Jaki heta kajf! O-o-oo!
Narešcie!
Ciažka zhadać jak i kolki ja išoŭ da hetaha majskaha dnia 2008-ha., kali Łukašenka padmachnuŭ zahad pra majo pryznačeńnie.
Z samaha dziacinstva ja maryŭ pra toje, kab mucić intehracyju brackich narodaŭ. Jak zaraz pamiataju toj dzień, kali mnie ŭ hałavu zapała hetaja fatalnaja dumka. U SSSR pryjechaŭ lider niejkaj sacyjalistyčnaj krainy Afryki, dvuchmetrovy čarnaskury žłob. U prahramie «Vriemia» byŭ repartaž z Šaramiećjeva. Ščupły Susłaŭ smačna pacałavaŭ baraćbita z kalanijalizmam u vusny. «Intehracyja prahresiŭnych narodaŭ u dziejańni», -- prakamentavaŭ dyktar pacałunak.
Intehracyja!
Ideja taho, što možna niešta intehravać žudasna zacikaviła mianie.
U toj čas, kali inšyja dzieci hulali u žmurki i cyhanili ŭ baćkoŭ 30 kapiejek na «Buracina», ja pačaŭ stavić pieršyja sproby intehracyi. Spačatku heta byli kubiki, papiera, baćkaŭ partbilet i prafsajuznaja knižka.
A što kali nam intehravać dziaržavy?, -- padumaj ja adnojčy. U tuju noč ja nia spaŭ. Ja źlapiŭ plastylinavuju sajuznuju dziaržavu Biełarusi i Rasiei. U škole adnaklaśniki dražnili mianie Voŭka-intehrała. Jak było ahidna čuć ad ich: «hladzi Voŭka-intehrała, pajšoŭ. Hej, Voŭka, kali pakažaš nam narešcie prajekt kanstytucyi Sajuznaj dziaržavy? Što, dahetul nie raspracavaŭ mechanizm pryznačeńnia Vyšejšaha kiraŭnictva? Cha-cha-cha!»
Potym universytet. Znoŭ ździeki. Bačyli b vy vočy kamsorha, kali ja prapanavaŭ jamu namalavać da naścienhazety fakultetu dadatak «Sajuz».
A žonka? Hetyja skandały: «Ja viedaju čamu ja ciabie pa barabanu, viedaju -- ab čym ty dumaješ u łožku — ab družbie słavianskich narodaŭ!»
U KHB ja padaŭsia, kab zabyć pra intehracyju. Naiŭny! Dumaŭ, što dla špijona, jaki žyvie emocyjami -- pahoni, pierastrełki, radystki Ket -- heta budzie jak dva palcy.
Ničoha padobnaha. Navat pryznačajučy jaŭki i paroli ja prakołvaŭsia: «Takim čynam, -- kazaŭ ja ahientu ŭ Drezdenie, -- pryjdzieš na jaŭku,skažaš parol: «Viarchoŭny dziaržsaviet pastanaviŭ vyraŭniać asnoŭnyja makraekanamičnyja pakaźniki i pravodzić adzinuju strukturnuju palityku». Adkaz: «Pastajanny kamitet sajuznaj dziaržavy pravodzić humanitarnaje vymiareńnie Sajuzu». Paŭtary».
Zabiŭ na ŭsio i z hałavoju syšoŭ u pracu čynoŭnika. Niečakana dla siabie zrabiŭ bujnuju kaŕjeru: premjer, vykanaŭca abaviazkaŭ Jelcyna, prezydent.
Ja razumieŭ, što na hetym etapie hałoŭnaje nie sarvacca. Viedajecie, kolki nervaŭ mianie heta kaštavała? Na absalutna biespantovych sajuznych samitach siadzieŭ jak toj daŭn. Na samoj spravie chaciełasia schapić jaho za hrudki, zaraŭci: «Pryznač mianie, pryznač staršyniom Sajuznaj Dziaržavy! Ja addam tabie ŭsio, što maju — žonku, hrošy, Hazprom, Smalensk!»
Niejak strymaŭsia.
Nu, i narešcie aperacyja “pierajemnik”. Hetyja Kasparavy, Chakamady, Kaśjanavy spačatku dumali, što ja rychtuju źmienu Kanstytucyi, što mnie treba pasada prezika, potym -- što ja zastajusia premjeram tolki dla taho, kab nie zhubić uładu.
Durni! Našto mianie ŭłada? Heta pył. Voś meta usiaho majho žyćcia — intehracyja!
Ładna, chopić nastalhičnych ekskursaŭ. Ja dasiahnuŭ taho ab čym maryŭ i samy čas atrymać niečałaviečy ekstaz. Pajdu pačytaju prajekt biudžetu Sajuzu na 2008-y hod. Hladzi ty, tolki padumaŭ, užo pačała kapitalna kiłbasić!
O-o-oo!
