Našych kanaistaŭ pazbavili Alimpijady z-za treniera, jaki vioz «Miłdranat» dla siabie?
Z aficyjnaha paviedamleńnia Mižnarodnaj fiederacyi kanoe (ICF) składana zrazumieć, za što mienavita naša mužčynskaja zbornaja pajšła pad razdaču.
Viadoma, što padčas zboraŭ u Francyi ŭ krasaviku ŭ treniera žanočaj kamandy Hienadzia Halickaha byli 16 tabletak «Miłdaranatu». Preparat nibyta prymaŭ sam trenier z-za prablem z sercam. Pry hetym u śpiecyjalista byŭ adpaviedny recept ad biełaruskaha ŭrača.
«Ale ŭ biełaruskich aptekach taki preparat pradajecca biez recepta. Ci možacie patłumačyć situacyju?» — z takim pytańniem Jeŭraradyjo źviartajecca da spartyŭnych funkcyjanieraŭ padčas pres-kanfierencyi 19 lipienia.
Na heta Hienadź Zaharodny, dyrektar Respublikanskaha navukova-praktyčnaha centra sportu, kaža, što pry ŭvozie takoha preparatu ŭ Jeŭrasajuz recept nieabchodny.
«Tamu jon byŭ u treniera i byŭ pradjaŭleny ŭ supravadžalnych dakumientach. Mieŭsia i zapis urača ŭ miedkarcie. Čałaviek uvioz dadzieny preparat u Jeŭrasajuz całkam aficyjna», — śćviardžaje Zaharodny.
U hutarku ŭklučajecca pieršy vice-prezident NAK Maksim Ryžankoŭ i dzielicca ŭłasnym dośviedam.
«Niadaŭna ja sam prachodziŭ miedabśledavańnie. Mnie prapanavali: «Vam by dla sardečka papić(«Miłdranat», — Jeŭraradyjo). Jon u aptekach pradajecca biez recepta, ale možam recept vypisać». Ja pytajusia: «Navošta?» Patłumačyli, što recept nieabchodny padčas pajezdak za miažu. Ja ŭ vyniku adkazaŭ: «Viedajecie, u suviazi sa skandałam, mnie nie patrebny ni sam preparat, ni recept na jaho». Napeŭna, u svoj čas trenier pavinien byŭ pastupić takim ža samym čynam», — razvažaje Ryžankoŭ.
Alaksandr Bahdanovič i Uładzimir Šantarovič. Lehiendarnyja kanaist i trenier.
Usiu hetuju hutarku nie moža słuchać spakojna Uładzimir Šantarovič, hałoŭny trenier nacyjanalnaj kamandy pa viesłavańni na bajdarkach i kanoe. Jon padkreślivaje, što prafiesijnyja spartsmieny, kali heta było dazvolena, prymali «Miłdranat» unutryvienna ŭ jakaści ŭznaŭlalnika. Sensu ad pryniaćcia tabletak niama. Hałoŭny trenier tłumačyć, što ni mytnyja orhany Francyi, ni Suśvietnaje antydopinhavaje ahienctva (WADA) nie majuć da jaho kamandy nijakich pretenzij.
«Tamu hetaja situacyja — złačynstva, sfabrykavanaje piaćciu siabrami Mižnarodnaj fiederacyi kanoe. Hetaja piaciorka ŭziała i puściła pad adchon žyćciovy los spartsmienaŭ i trenieraŭ. Jak jany buduć žyć dalej? I jak dalej budzie žyć hetaja piaciorka? Ich ža za heta praklanuć!» — nie strymlivaje emocyj Šantarovič.
Hazieta Le Mond sa spasyłkaj na «kampietentnyja krynicy» paviedamiła, što padčas vobšuku ŭ biełaruskaj zbornaj byli znojdzienyja šprycy i kropielnicy. Choć niepasredna dopinhu nie znajšli.
Dyrektar Nacyjanalnaha antydopinhavaha ahienctva Biełarusi Dzianis Mužuchintłumačyć Jeŭraradyjo, što tolki najaŭnaść šprycaŭ nie źjaŭlajecca parušeńniem antydopinhavych praviłaŭ. Što tyčycca kropielnic, parušeńnie fiksujecca tolki ŭ peŭnych vypadkach.
«Kali budzie dakazana, što ŭnutryviennyja ŭlivańni składajuć bolš za 50 mililitraŭ ciaham mienš jak šaści hadzin», — tłumačyć Mužuchin.
Adnak pra parušeńni takoha kštałtu ŭ zajavie ź Mižnarodnaj fiederacyi kanoe ničoha nie skazana.
U Kazachstana čatyry vypadki spažyvańnia steroidaŭ, ale na Alimpijadu zbornaja jedzie
Aproč zbornaj Biełarusi, ad Alimpijady adchilili rumynskich kanaistaŭ. Roźnica ŭ tym, zajaŭlaje hienieralny sakratar NAKu Anatol Kotaŭ, što ŭ zbornaj Rumynii 11 paćvierdžanych vypadkaŭ parušeńniaŭ antydopinhavych praviłaŭ. U nas takich dakazanych vypadkaŭ na hety momant niama.
U zbornaj Kazachstana — čatyry vypadki za spažyvańnie ciažkich anabaličnych steroidaŭ. Ale kazachstancy na Alimpijadu jeduć.
«Adkul uziali takuju sankcyju, jak adchileńnie ad spabornictvaŭ cełaj kamandy!— aburajecca Kotaŭ. — Ni ŭ antydopinhavych praviłach, ni ŭ statucie mižnarodnaj fiederacyi niama havorki pra mahčymaść adchileńnia kamandy. Na hetaje pytańnie my atrymali tumanny kamientaryj, što hetaja miera ŭsprymajecca jak dadatkovaje ŭździejańnie dla baraćby z dopinham. Tamu my i robim vysnovu, što ŭ Mižnarodnaj fiederacyi pieršapačatkova nie było žadańnia pravieści hruntoŭnaje rasśledavańnie i razabracca ŭ situacyi».
Biełaruskija spartovyja čynoŭniki mieli sutki dla taho, kab nakiravać isk u spartyŭny arbitraž Łazany. Jany pierakananyja ŭ pieramozie. Prablema ŭ tym, što na razhlad patrebny čas, jakoha da Alimpijady amal nie zastałosia.
