Partuhalija navat biez traŭmavanaha Ranałdu stała čempijonam Jeŭra-2016
00:29
Usio, kaniec hulni! Partuhalija — čempijon Jeŭra-2016! Navat biez traŭmavanaha kapitana Kryšcijanu Ranałdu kamanda zdoleła pieramahčy ŭ finale haspadaroŭ-francuzaŭ.
Pieramohu prynios hoł Edera na 109-j chvilinie hulni.
00:25
Francyja ŭsimi siłami idzie napierad, i heta daje partuhalcam mahčymaści dla imklivych kontratak.
00:21
Voś heta raźviazka! Napadajučy partuhalcaŭ prabiŭ zdalok, ale trapiŭ dakładna ŭ kut varot supiernika.
I heta toj samy Eder, jaki za pałovu siezona ŭ valijskim «Suonsi» nie zdoleŭ zabić nivodnaha hoła!
00:19
HOOOOOOOOŁ! EDER!!!!! 1-0 na karyść Partuhalii!
00:18
Kamičny vypadak ledź nie pryvioŭ da francuzskaj trahiedyi: rukoj zhulaŭ partuhalec Eder, a sudździ padałosia, što francuz Kasielny. U vyniku Kasielny atrymaŭ niezasłužanuju žoŭtuju kartku, a partuhalcy — prava na pierśpiektyŭny štrafny. Hierejru patrapiŭ u pierakładzinu.
00:16
Pačalisia apošnija 15 chvilin hulni. Ci varta ŭžo zapasacca nastrojvacca na pienalci?
00:11
Pakul my škadavali partuhalcaŭ, jany nanieśli druhi dakładny ŭdar pa varotach francuzaŭ. Hołam moh adznačycca Eder, jaki vyjšaŭ na zamienu. I tolki vykinutaja ruka Ljarysa ŭratavała haspadaroŭ Jeŭra.
Adnak ahulnaja statystyka pa dakładnych strełach — 7:2 na karyść francuzaŭ.
00:09
Karespandent «Našaj Nivy» Źmicier Pankaviec adznačaje, što ciapier pieražyvaje za Partuhaliju. Napeŭna, takoj pazicyi prytrymlivajucca mnohija «niejtralnyja» hledačy, jakija ŭ padobnych situacyjach padtrymlivajuć słabiejšaha.
00:03
Na dziva, Partuhalija ŭ pačatku ekstra-tajma ŭziała miač pad svoj kantrol.
Cikava, što matč nie vyhladaje brudnym. Abiedźvie kamandy ahułam pakul parušyli praviły tolki 18 razoŭ. Ale, nahadajem, adzin z hetych fałoŭ prymusiŭ Kryštyjanu Ranałdu daterminova syści z pola.
Ciapier jon padkazvaje partnioram z łavy zapasnych.
23:52
Upieršyniu ŭ historyi čempijanataŭ Jeŭropy asnoŭny čas finału skončyŭsia biezhalavoj ničyjoj. Choć vyrašalnyja hulni turnira redka byvajuć bahatymi na hały. Papiaredni raz Ispanija źniščyła Italiju ź likam 4:0, i toje było vyklučeńnie z praviłaŭ. Pierad tym dva razy matčy skančvalisia ź likam 1:0 (pieramahali Hrecyja i Ispanija).
Čakajem dadatkovych 30 chvilin.
23:50
Jaki momant u Žyńjaka!!! Za chvilinu da kanca hulni napadajučy francuzaŭ ź niekalkich mietraŭ prabiŭ u štanhu. I heta ŭ jaho było niekalki siekund, kab prycelicca. Ale miač pa-zdradnicku zvaliŭsia z nahi.
23:48
Pakul što najlepšy hulec matča — bramnik partuhalcaŭ Ruj Patrysiu. Na jaho rachunku siem sejvaŭ.
23:46
Da zakančeńnia asnoŭnaha času hulni zastajecca niekalki chvilin. Kali ničoha nie źmienicca, nas čakajuć dadatkovyja paŭhadziny. Kali i jany nie daduć plonu, ubačym hulniu niervaŭ — paślamatčavyja pienalci.
23:38
Kab uzmacnić hulniu ŭ atacy, kožny z trenieraŭ vypuściŭ na zamienu pa napadajučym.
U Francyi hulaje Žyńjak z čempijanatu Mieksiki (!), a ŭ Partuhalii — Eder.
I voś na 79-j chvilinie partuhalcami namahańniami Nani i Kvarežmy nanieśli pieršy dakładny streł. Nula ŭ statystyčnaj padborcy bolš niama.
23:33
Nu a Partuhalija za 75 chvilin hulni tak ni razu nie zdoleła dakładna prabić pa varotach Francyi. Na miescy bramnika Ljarysa moh stajać luby zaŭziatar zbornaj — usio adno ničoha rabić nie treba.
Taki matč u Partuhalii ŭžo byŭ — u 1/8 finału suprać Charvatyi futbalisty pieršy raz prabili dakładna pa varotach na 117-j chvilinie. Ale hetaha tady chapiła dla pieramohi!
23:30
Skažam ščyra: samym spraviadlivym vynikam finału stanie nulavaja ničyja. Francuzy, moža, i nahulali na dźvie traciny hołu, ale nie bolš za toje. Taki matč pierahladać dakładna nie zachočacca.
23:23
Statystyka druhoha tajma dobra charaktaryzuje situacyju na pole. Pa ŭdarach pa varotach Francyja napieradzie — 2:0. A miač kamandy pierakatvajuć prykoładna adnolkavuju kolkaść času.
Voś tak vyhladaŭ udar Sisoka ŭ pieršym tajmie.
23:16
Pieršaja zamiena ŭ Francyi. Z pola sychodzić Dzimitry Pajet. Francuzskija zaŭziatary vitajuć jaho apładysmientami, partuhalskija — śvistam. Bo mienavita jon nanies toj samy ŭdar pa kalenie Ranałdu.
Hulniu pasprabuje ŭzmacnić 20-hadovy Kinhśli Koman.
23:12
Paśla pierapynku hulnia nie źmianiłasia. Francyja nibyta atakuje bolš časta, adnak nijakaha plonu heta nie daje.
23:09
Mnohija hledačy zaŭvažyli, što ŭ kadr pastajanna traplajuć nasiakomyja.
Akazvajecca, moški nasamreč apanavali pole. Adna ź viersij — učora ŭviečary rabotniki stadyjona nie vyklučyli pražektary i nasiakomyja źlacielisia na śviatło.
22:48
Pieršy tajm skončany, nivodnaha hoła kamandy tak i nie zabili. Nichto nie biažyć napierad złamaŭšy hałavu. Samym niebiaśpiečnym momantam byŭ udar Antuana Hryzmana hałavoj pad pierakładzinu. Adnak surjoznaha cisku na varoty partuhalcaŭ pakul nie było.
Kaeficyjent na pieramohu Partuhalii tym časam uźniaŭsia da 6.0. Dla paraŭnańnia, pieramoha Francyi i ničyja — adnolkavyja 2.2.
22:41
Jak hulać biez Ranałdu, partuhalcy prosta nie razumiejuć. Moža, trenier niešta prydumaje padčas pierapynku. Ale pry ciapierašniaj dyspazicyi ich aryjencir — datrymacca da kanca hulni i vyznačyć pieramožcu pa pienalci.
22:35
Francuz Sisoka niebiaśpiečna prabiŭ z-pad partuhalskaha abaroncy.
Statystyka ŭdaraŭ — 6:2 na karyść francuzaŭ, dakładnych udaraŭ — 3:0. Pa vałodańni miačom jany taksama napiedadzie — 60%:40%.
22:32
Traŭma Ranałdu stała samaj zaŭvažnaj padziejaj pieršaj paŭhadziny hulni. Francyja nie moža davieści ataki da łahičnaha zaviaršeńnia, a Partuhalii redka kali ŭdajecca pravieści choć jakuju ataku.
22:25
I ŭsio ž hulać Kryštyjanu Ranałdu nie zmoža. Jaho vynosiać z pola na nasiłkach. Zamiest kapitana vyjdzie vieteran kamandy, cyhan Rykardu Kvarežma, ale chiba heta paŭnavartasnaja zamiena?
22:23
Francyja ciśnie, ale da surjoznych pahrozaŭ sprava nie dachodzić.
22:20
Na ŭvieś śviet pakazvajuć ślozy Kryštyjanu Ranałdu. Mahčyma, daviadziecca ŭsio ž rabić zamienu. U takim razie finał biez adnaho z dvuch najlepšych futbalistaŭ śvietu budzie vyhladać bolš blakłym.
22:15
Na rachunku francuzaŭ vielmi niebiaśpiečny ŭdar ad Hryzmana — zdoleŭ vyratavać bramnik partuhalcaŭ Ruj Patrysiu.
Francuzy naładžvajuć vysoki presinh — jany napadajuć na abaroncaŭ Partuhalii, nie dajučy im navat addać pieradaču kamuści z partnioraŭ. U takija momanty Francyja hulaje ŭ dva napadniki, Žyru i Hryzmana.
A Partuhalii sprabuje zaviazać hulniu praz maładoha Renata Sanšaša. Jon advajavaŭ sabie miesca ŭ asnovie tolki padčas Jeŭra-2016 i značna ŭzmacniŭ hulniu kamandy.
22:09
Tym časam balučaje paškodžańnie atrymaŭ Kryštyjanu Ranałdu. Viadoma ž, jon viernie na pole, chaj i traŭmavany, chaj i na adnoj nazie. Ranałdu nie vyjhravaŭ nivodnaha top-turnira sa zbornaj Partuhalii i spadziajecca realizavać svaju maru siońnia.
The challenge that caught Ronaldo's knee pic.twitter.com/TLxTZw9pyd
Niekalki słovaŭ pra raskładki bukmiekieraŭ. Vidavočnym favarytam ličycca Francyja (kaeficyjent 2.2). Staŭka na ničyju ŭ asnoŭny čas — 2,75, a na Partuhaliju tolki 4,33.
Nu i statystyka kaža sama za siabie: Partuhalija prajhrała Francyi 10 (!) apošnich matčaŭ zapar.
22:05
Adnak pieršy ŭdar na rachunku Partuhalii. Pravy paŭabaronca Nani adhuknuŭsia na dalokuju pieradaču i prabiŭ vyšej za varoty.
Nani niekali ličyŭsia zvyšpierśpiektyŭnym hulcom, adnak svoj talent tak i nie realizavaŭ całkam. Ciapier były futbalist «Mančeścier Junajted» dahulvaje za turecki «Fienierbachče».
22:01
Hulnia pačałasia z ataki francuzaŭ. Jak čakajecca, mienavita heta zbornaja budzie čaściej kantralavać miač. A partuhalcy, u svaju čarhu, spadziajucca dačakacca pamyłak supiernika.
* * *
U Paryžy prachodzić finał čempijanata Jeŭropy-2016, hulajuć Partuhalija i Francyja. «Naša Niva» praviadzie anłajn-tranślacyju sustrečy.
* * *
Za haspadaroŭ, zbornuju Francyi, vyjšaŭ toj samy skład, što i niekalki dzion tamu ŭ paŭfinale suprać Hiermanii: Ljarys, Kasielny, Eŭra, Sańja, Umcici, Pahba, Maćjudzi, Pajet, Sisoka, Hryzman i Žyru.
Hałoŭnaja nadzieja kamandy — atakujučy paŭabaronca Antuan Hryzman z madrydskaha «Atletyka». Jon pakul što najlepšy snajpier hetaha Jeŭra.
U składzie Partuhalii nastupnyja futbalisty: Ruj Patrysiu, Pepe, Hierejru, Saarieš, Fonte, Adryen Siłva, Viljam Karvalju, Nani, Sanšaš, Žaau Maryu i Kryštyjanu Ranałdu.
