Za ŭvoz tavaraŭ zvyš limitu biełarusy buduć płacić nie tolki pošlinu, ale i PDK
Z 14 krasavika biełarusam, jakija pierasiakajuć miažu bolš za adzin raz na try miesiacy i ŭvoziać tavar bolš čym na 300 jeŭra abo vahoj bolš za 20 kh, daviadziecca zapłacić nie tolki uvaznuju mytnuju pošlinu i mytny zbor, ale i PDK. Spahaniać PDK buduć nie z koštu ŭsiaho tavaru, a tolki z toj jaho častki, jakaja pieravyšaje ŭstanoŭlenyja limity.
Ciapier biełarusy, niezaležna ad kolkaści pierasiačeńniaŭ miažy, mohuć pravieźci dla asabistaha karystańnia tavar na sumu da 1500 jeŭra i vahoj nie bolš za 50 kiłahram. Kali pieravysić hetyja limity, to treba zapłacić mytny zbor pamieram 30% ad koštu tavaru, ale nie mienš za 4 jeŭra za adzin kiłahram jaki pieravyšaje vahi.
Ale z 14 krasavika dla tych, chto budzie pierasiakać miažu bolš za adzin raz u try miesiacy, uvodziacca abmiežavańni. Tak, pry pieršaj pajezdcy na praciahu troch miesiacaŭ zastanucca raniejšyja limity i ciapierašnija zbory za ich pieravyšeńnie. Ale pry druhoj i nastupnych pajezdkach naziemnym transpartam na praciahu troch miesiacaŭ (niezaležna ad mety pajezdki - kamandziroŭka, šop-tur, vizit da svajakoŭ ci padarožža) biez vypłaty pošliny možna budzie zavieźci rečy na sumu nie bolš za 300 jeŭra abo vahoj nie bolš za 20 kiłahramaŭ.
Za pieravyšeńnie normy treba budzie zapłacić nie tolki uvaznuju mytnuju pošlinu pa staŭcy Adzinaha mytnaha taryfu JEAES (zaležyć ad ułaścivaściaŭ i charaktarystyk kankretnaha tavaru) i mytny zbor (u ekvivalencie 20 albo 50 jeŭra), ale i ŭnieści jašče PDK.
— Tavary, jakija pieravyšajuć ustanoŭlenyja limity dla pravozu fizičnymi asobami praź miažu, nie buduć stavicca da tavaraŭ dla asabistaha karystańnia. U takim vypadku treba budzie zapłacić mytnyja zbory, - rastłumačyli ŭ Dziaržaŭnym mytnym kamitecie. Śpiecyjalisty DMK zavastrajuć uvahu, što PDK budzie spahaniacca nie z usiaho tavaru, a tolki ź pieravyšeńnia limitaŭ.
Dapuścim, biełarus nie ukłaŭsia ŭ normu. Jon viazie mikrachvaloŭku za 300 jeŭra vahoj 8 kiłahram i mabilny telefon za 150 jeŭra. U ahulnaj składanaści košt tavaru - 450 jeŭra, pieravyšeńnie limitu - 150 jeŭra. I kali mikrachvaleŭka ŭvachodzić u limity, to za telefon pryjdziecca ŭnieści mytnyja płaciažy. Tak, mytny zbor za mabilnik składzie 50 jeŭra, mytnaja pošlina - 0% (jaje pamier zaležyć ad katehoryi tavaru, u dadzienym vypadku nulavy), a taksama PDK — 30 jeŭra. U vyniku telefon, za jaki pryjdziecca ŭnieści mytnyja płaciažy ŭ ahulnaj sumie 80 jeŭra, budzie kaštavać 230 jeŭra.
«Nazvanyja vyšej płaciažy daviadziecca zapłacić u dačynieńni da tych tavaraŭ, jakija nie ŭkładvajucca ŭ limit tavaraŭ dla asabistaha karystańnia. Jakija mienavita tavary adnieści ŭ hety limit — vyrašać samomu hramadzianinu. Jon moža paznačyć heta ŭ svajoj dekłaracyi», - adznačajuć u DMK.
Vypłata ŭsich uznosaŭ robicca ŭ biełaruskich rublach u pieraliku pa kursie Nacbanka na dzień ŭjezdu, kažuć mytniki.
Adznačym, što pry pierasiačeńni miažy avijatranspartam limity na tavary zastajucca raniejšymi - na sumu da 1500 jeŭra i vahoj nie bolš za 50 kiłahram, niezaležna ad kolkaści pajezdak za miažu.
Mytny zbor składaje 20 i 50 jeŭra ŭ zaležnaści ad hrupy tavaru. Da prykładu, zbor u 20 jeŭra treba zapłacić za pravoz praduktaŭ žyviolnaha i raślinnaha pachodžańnia, hatovych charčovych praduktaŭ, ałkaholnych i biezałkaholnych napojaŭ, tytuniu, farmaceŭtyčnaj pradukcyi, tavaraŭ sa skury, tekstylnych vyrabaŭ, abutku i inšych tavaraŭ.
Maksimalny zbor u 50 jeŭra pryjdziecca zapłacić, da prykładu, za pramysłovyja tavary (cacki, mebla, paścielnyja prynaležnaści, lampy i aśviatlalnaje abstalavańnie i inšaje), tvory mastactva, pradmiety kalekcyjavańnia i antykvaryjat, žemčuh pryrodny abo kultyvavany, kaštoŭnyja abo napaŭkaštoŭnyja kamiani; mašyny i inšyja tavary.
Nahadajem, z 14 krasavika taksama ŭvodziacca novyja limity na mižnarodnyja pasyłki - da 22 jeŭra i vahoj da 10 kiłahramaŭ.
