Dziŭnyja «ŭkrainskija» stendy na Minskim knižnym kirmašy
Piša ŭ fejsbuku historyk Alaksandr Paškievič.
Viadoma, usio maje i pazityŭny bok, i niehatyŭny. Ale ŭ Minskaj knižnaj vystavie niehatyŭnaje pieravažaje jaŭna. Najpierš — što rasijskaja impierskaja atruta točycca pieradusim zusim nie sa stendaŭ rasijskich vydaviectvaŭ. Ništo nie paraŭnajecca ŭ ciemrašalstvie sa stendam pad nazvaj «Ośvita Ukrainy» (tak napisana na šyldzie). Tut na samym kazyrnym miescy — ažno siem knižak sumnaviadomaha niabožčyka Alesia Buziny. I šmat inšych vydańniaŭ padobnaj skiravanaści.
Dobraja pałova knižak z hetaha «ŭkrainskaha» stendu vyjšła ŭ śviet u Rasii. Naturalna, bolšaść ź ich adpaviednaj aryjentacyi. Čaho vartaja adna kniha Siarhieja Hłaźjeva «Ukrainskaja katastrofa: ot amierikanskoj ahrieśsii k mirovoj vojnie?», dzie naŭprost viadziecca havorka pra «fašistskoje biezumije» va Ukrainie. Prosta až niajomka mima chadzić — choć davodzicca.
Zrešty, mnohija mohuć rezonna skazać — vidać, havorka idzie pra niejkaje pryvatnaje vydaviectva, jakoje samo apłaciła svoj udzieł u vystavie i tamu maje poŭnaje prava farmavać svoj stend takimi vydańniami, jakimi paličyć patrebnym. Mahčyma, takoje mierkavańnie i nie pazbaŭlenaje peŭnaj racyi. Ale što supraćpastaŭlaje takoj pazicyi placoŭka pad nazvaj «Nacionalnyj stiend Ukrainy», u farmavańni jakoj, miarkujučy z najmieńnia, pavinna była b być ščylna zaanhažavanaja ambasada Ukrainy? Dy amal ničoha. Nu, dobra, tracina stendu addadziena pad roznyja albomy i inšyja vydańni, datyčnyja historyi i etnahrafii Ukrainy (chaj sabie i pa zavobłačnych cenach). Ale ŭ toj ža čas druhaja tracina — heta rasijskamoŭnyja śpiecyjalizavanyja miedycynskija vydańni (mo sami pa sabie i kaštoŭnyja, ale čamu jany pavinny zajmać až stolki miesca na nacyjanalnym ukrainskim stendzie?). A rešta — znoŭ taki rasijskamoŭnyja vydańni dla dziaciej, prytym pieradusim nie ŭkrainskich, a rasijskich aŭtaraŭ («Pryhody Niaznajki» M. Nosava, «Pryhody Buracina» A. Tałstoha i inš.). Ničoha nie maju suprać hetych piśmieńnikaŭ i ich tvoraŭ, ale znoŭ taki — čamu mienavita jany pradstaŭlajuć bahatuju i samabytnuju ŭkrainskuju kulturu ŭ Biełarusi? Prytym, padobna, za košt ukrainskaha biudžetu?
