Top-60 čynoŭnikaŭ Biełarusi: hrodzienskija vycisnuli mahiloŭskich
«Naša Niva» prapanuje tradycyjny ahlad łukašenkaŭskich elitaŭ. Papiarednija byli zroblenyja ŭ 2009, 2011 i 2013 hadach.
Dla razhladu my ŭziali premjer-ministra, vice-premjeraŭ, śpikieraŭ abiedźviuch pałat parłamienta, staršyń asnoŭnych sudoŭ, pradstaŭnikoŭ Administracyi prezidenta, hienprakurora, kiraŭnika spraŭ prezidenta, ministraŭ, staršyń dziaržaŭnych i nacyjanalnych kamitetaŭ, staršyń abłvykankamaŭ, staršyniu CVK, Nacbanka, IAC i dziaržsakratara Rady biaśpieki. Takim čynam, atrymałasia 63 čałavieki. Vakantnych pasad na dadzieny momant niama, usie zapoŭnienyja.
U paraŭnańni sa śpisam 2013-ha hoda źjaviłasia 25 adroznych proźviščaŭ. Niechta ŭpieršyniu atrymaŭ vysokuju pasadu, a inšyja znoŭ viernutyja ŭ vyšejšyja ešałony (Anfimaŭ).
Starejšyja za Ukrainu, maładziejšyja za Niamieččynu
Letaś Alaksandr Łukašenka mieŭ sustreču ź ministram zamiežnych spraŭ Aŭstryi Siebaśćianam Kurcam.
Dla paraŭnańnia: ministru zamiežnych spravaŭ Aŭstryi 29 hadoŭ.
Dva hady tamu, kali Kurca pryznačyli na takuju vysokuju pasadu, jamu było ŭsiaho 27 hadoŭ. Jon navat nie mieŭ zakončanaj vyšejšaj adukacyi, ale ŭ Aŭstryi jamu davieryli takuju adkaznuju pracu. Mikałaju II, kali jon uzyšoŭ na rasijski tron, było ŭsiaho 26 hadoŭ.
Z druhoha boku, Vałdasu Adamkusu spoŭniłasia 77 hadoŭ, kali jon u druhi raz zastupaŭ na pasadu prezidenta Litvy. Siaredni ŭzrost biełaruskaha čynoŭnika najvyšejšaha ranhu skłaŭ 53,7 hoda. I heta rekord u paraŭnańni z papiarednimi zamierami. Kali paraŭnać ź ličbaj dvuchhadovaj daŭniny, to jana źmienšyłasia bolš čym na 2 hady (z 55,8).
53,7 — heta mnoha ci mała? U roznych krainach roznyja padychody. Naprykład, heta našmat bolej, čym maje ŭkrainski kabiniet ministraŭ. Jaho siaredni ŭzrost składaje 44,4 hoda. Najmaładziejšaj Hańnie Aniščanka tam usiaho 31 hod. Vice-premjeru Valeryju Vaščeŭskamu 59 hadoŭ — jon najstarejšy. Premjer-ministr Ukrainy Arsienij Jacaniuk pa biełaruskich mierkach taksama jašče «zialony», jamu 41 hod.
Dla paraŭnańnia: Hanna Aniščanka — najmaładziejšaja ŭkrainskaja ministarka.
Zatoje siaredni ŭzrost fiederalnaha ŭrada Hiermanii jašče vyšejšy, čym u Biełarusi, jon składaje 56,4 hoda. Najstarejšamu, ministru finansaŭ Volfhanhu Šojble, u vieraśni spoŭniłasia až 73 hady. Samaja maładaja ministarka ŭ Hiermanii — heta Manueła Šviezih, jakaja adkazvaje za spravy siamji, piensijanieraŭ, žančyn, moładzi. Joj 41 hod. Adnak tut varta źviarnuć uvahu, što ŭ Niamieččynie i žančyny, i mužčyny vychodziać na piensiju paśla 65 hadoŭ. Dy i siaredniaja praciahłaść žyćcia tam składaje 80 hadoŭ, a nie 70, jak u Biełarusi.
Samy małady — ministr ŽKH
37-hadovy Alaksandr Cierachaŭ pryjechaŭ u Minsk z Homiela.
Samy małady ministr u biełaruskim uradzie — Alaksandr Cierachaŭ, u padnačaleńni jakoha ministerstva ŽKH. Jamu 37 hadoŭ. Varta adznačyć, što i papiarednik Cierachava Andrej Šorac, siońniašni kiraŭnik Minska, taksama byŭ pryznačany na pasadu da 40 hadoŭ.
Tolki na hod starejšy za Cierachava kiraŭnik dziaržaŭnaha kamiteta pa majomaści Andrej Hajeŭ. Jon užo bolš za hod znachodzicca na svajoj pasadzie, ale redka byvaje na słychu praź niepubličnaść viedamstva, jakoje jon uznačalvaje.
Andrej Hajeŭ — asoba niepubličnaja.
Pamočniku prezidenta pa pytańniach ekanomiki Kiryłu Rudamu 37 hadoŭ, a pamočniku pa pytańniach biaśpieki Viktaru Łukašenku — 39.
Z tych, kamu krychu za 40, varta adznačyć kiraŭnika Infarmacyjna-analityčnaha centra Alaksieja Dzierbina (40), staršyniu kamiteta sudovych ekśpiertyz Andreja Švieda (42), kiraŭnika Minska Andreja Šorca (42), ministra pa padatkach i zborach Siarhieja Nalivajku (42), namieśnika kiraŭnika Administracyi prezidenta pa pytańniach ideałohii Ihara Buzoŭskaha (43), ministra justycyi Aleha Śližeŭskaha (43), kiraŭnika kamiteta pa navucy i technałohijach Alaksandra Šumilina (44), staršyniu Śledčaha kamiteta Ivana Naskieviča (45). U pryncypie, možna kanstatavać, što čynoŭnikaŭ maładziejšaha pakaleńnia paboleła.
Alaksiej Dzierbin adzin z maładziejšych u kirujučaj elicie.
15 piensijanieraŭ
Adpaviedna, źniziłasia i kolkaść piensijanieraŭ. Ciapier siarod top-čynavienstva ich 15 čałaviek. Dva hady tamu byŭ 21. Syšli na adpačynak Hieroj Biełarusi Piatro Prakapovič i vice-premjer Anatol Tozik, niama siońnia ŭ kałodzie Łukašenki Alaksandra Radźkova, adpraŭleny ŭ adstaŭku ministr abarony Juryj Žadobin, kiraŭnik Brestčyny Kanstancin Sumar.
Syšoŭ sa sceny śpikier savieta respubliki, stalinist i aŭtar «tualecišča» Anatol Rubinaŭ.
Valancin Sukała — vieteran sudovaj sistemy.
Na siońnia najstarejšym čynoŭnikam vysokaha ranhu źjaŭlajecca staršynia Viarchoŭnaha suda Valancin Sukała (73 hady), jon byŭ ministram justycyi jašče za časami BSSR.
Adrazu za im iduć troje 66-hadovych. Heta vice-premjer Uładzimir Siamaška, jaki zajmajecca pytańniami enierhanośbitaŭ va ŭradzie ŭžo amal 15 hadoŭ, śpikier pałaty pradstaŭnikoŭ Uładzimir Andrejčanka i kiraŭnik Pamiežnaha kamiteta Leanid Malcaŭ. Tolki na hod mieniej staršyni savieta respubliki Michaiłu Miaśnikoviču.
Uładzimir Siamaška — doŭhažychar biełaruskaj palityki.
Piensijnaha vieku taksama dasiahnuli: kiraŭnik Vajskova- pramysłovaha kamiteta Siarhiej Huruloŭ (62), staršyńka CVK Lidzija Jarmošyna (62), hrodzienski «hubiernatar» Uładzimir Kraŭcoŭ (62), kiraŭnik KDK Leanid Anfimaŭ (61), vice-premjer pa sielskaj haspadarcy Michaił Rusy (61), staršynia Kanstytucyjnaha suda Piatro Mikłaševič (61), pieršy namieśnik kiraŭnika Administracyi prezidenta Kanstancin Martyniecki (60), ministr ekanomiki Uładzimir Zinoŭski (60).
Lilija Ananič — samaja maładaja piensijanierka.
Samymi maładymi piensijanierami źjaŭlajucca ministarka pracy i sacyjalnaj abarony Maryjana Ščotkina (57) i ministarka infarmacyi Lilija Ananič (55).
Daktary navuk
Siarod 63 čynoŭnikaŭ jość 5 daktaroŭ navuk. Varta adznačyć, što kolkaść tych, chto zabiaśpiečyŭ sabie akademičny ranh, stabilna źmianšajecca. Daktarami navuk źjaŭlajucca Michaił Miaśnikovič (ekanamičnych), kiraŭnik Administracyi prezidenta Alaksandr Kosiniec (miedycynskich), ministr adukacyi Michaił Žuraŭkoŭ (fizika-matematyčnych), Leanid Malcaŭ (palitałahičnych) i staršynia Minabłvykankama Siamion Šapira (ekanamičnych).
Siamion Šapira — doktar ekanamičnych navuk.
Jašče vaśmiora źjaŭlajucca kandydatami navuk. Heta znoŭku ž Leanid Malcaŭ (sacyjałahičnych), Andrej Švied (jurydyčnych), staršynia Nacbanka Pavieł Kałaŭr (ekanamičnych), dziaržsakratar Rady biaśpieki Stanisłaŭ Zaś (vajskovych), Alaksiej Dzierbin (jurydyčnych), Alaksandr Šumilin (ekanamičnych), Barys Śviatłoŭ (fiłasofskich), Vasil Maciušeŭski (ekanamičnych).
Narodžanyja nie ŭ Biełarusi
Takich na dadzieny momant zastajecca 9 čałaviek, stolki ž było i ŭ 2013-m. Z uschodniaj Ukrainy pachodziać Stanisłaŭ Zaś i ministr unutranych spraŭ Ihar Šunievič. Dziela spraviadlivaści varta adznačyć, što Šunievič ci nie adziny ź siłavikoŭ, chto atrymlivaŭ adukacyju ŭ Biełarusi.
Stanisłaŭ Zaś naradziŭsia va Ukrainie.
Siem čałaviek pachodzić z Rasii. Tut taksama treba adznačyć, što ŭ bolšaści ź ich staleńnie, navučańnie prachodziła jakraz u Biełarusi. Vyklučeńniem chiba možna nazvać Siarhieja Hurulova (rodam z Čyty) i Maryjanu Ščotkinu, pachodzić z Murmanskaj vobłaści, navučałasia ŭ Leninhradzie.
Ščotkina pryjechała ŭ Biełaruś z Zapalarja.
Astatnija ž uradžency Rasii žyvuć u Biełarusi z maładych hadoŭ: premjer-ministr Andrej Kabiakoŭ, ministr architektury i budaŭnictva Anatol Čorny, ministr MNS Uładzimir Vaščanka, Leanid Anfimaŭ, Uładzimir Kraŭcoŭ.
Najbolš z Hrodzienščyny, najmieniej z Brestyčyny
Astatnija 54 čałavieki naradzilisia na terytoryi Biełarusi. Viaskoŭcaŭ pa naradžeńni ŭsio jašče bolej za haradžan — 28 na 26.
Šaściora čałaviek naradzilisia ŭ Minsku: Valancin Sukała, ministr kultury Barys Śviatłoŭ, ministr sportu i turyzmu Alaksandr Šamko, ministr finansaŭ Uładzimir Amaryn, kiraŭnička Biełstata Ina Miadźviedzieva i Alaksiej Dzierbin.
Barys Śviatłoŭ naradziŭsia ŭ Minsku ŭ siamji intelihientaŭ.
Jašče šaściora naradzilisia ŭ abłasnych centrach: hienieralny prakuror Alaksandr Kaniuk i Aleh Śližeŭski — u Hrodnie, namieśnik kiraŭnika Administracyi prezidenta Mikałaj Snapkoŭ i ministr pryrodnych resursaŭ Andrej Kaŭchuta — u Mahilovie, Alaksandr Cierachaŭ — u Homieli, Andrej Šorac — u Viciebsku. Nivodnaha vysokaha čynoŭnika niama rodam z Bresta.
Siarod drabniejšych rajonnych centraŭ lidzirujuć Aršanski i Kalinkavicki. Z uschodniaj Viciebščyny rodam pieršy vice-premjer Vasil Maciušeŭski, Alaksandr Kosiniec i staršynia Viciebskaha abłvykankama — Mikałaj Šarstnioŭ. Z Kalinkavickaha rajona — Uładzimir Siamaška, ministr pramysłovaści Vital Voŭk, a taksama kiraŭnik kamiteta pa standyrtyzacyi Viktar Nazaranka.
Mikałaj Šarstnioŭ (źleva) i Vasil Maciušeŭski rodam z Aršanskaha rajona.
Z Drahičynskaha rajona rodam staršynia KDB Valeryj Vakulčyk i Vasil Žarko. Z Karelickaha — ministr zamiežnych spravaŭ Uładzimir Makiej i kiraŭnik mytnaha kamiteta Juryj Siańko. Z Navahrudskaha — Ihar Buzoŭski i ministr lasnoj haspadarki Michaił Amieljanovič. Sa Słuckaha — ministr sielskaj haspadarki Leanid Zajac i Lidzija Jarmošyna. Sa Stolinskaha — Pavieł Kałaŭr i Ivan Naskievič.
Jašče pa adnym čałavieku jość z Krasnapolskaha, Połackaha, Žytkavickaha, Niaśvižskaha, Loźnienskaha, Vilejskaha, Haradockaha, Lidskaha, Voranaŭskaha, Barysaŭskaha, Biešankovickaha, Salihorskaha, Babrujskaha, Horackaha, Červieńskaha, Naraŭlanskaha, Asipovickaha, Śvietłahorskaha, Smarhonskaha, Biarozaŭskaha, Słonimskaha, Lelčyckaha, Lubanskaha, Mastoŭskaha, Rečyckaha i Dziaržynskaha rajonaŭ.
Najsłabiej pradstaŭlena Bresckaja vobłaść (5 čałaviek) i Mahiloŭskaja (6). Najbolš ža pradstaŭnikoŭ z Hrodzienščyny — ažno 11.
Paśla adstaŭki Valancina Šajeva va ŭładzie nie zastałosia ludziej, narodžanych u zachodniaj Viciebščynie.
Paśla adstaŭki kiraŭnika Śledčaha kamiteta Valancina Šajeva (rodam z Hłybokaha) zusim nie pradstaŭlenaja zachodniaja Viciebščyna.
Akademija kiravańnia jak druhaja adukacyja
Siarod navučalnych ustanovaŭ, što skančvali čynoŭniki, lidziruje BDU. Dypłomy hetaj VNU majuć 12 čałaviek. Narhas skončyli dziaviaciera čałaviek. Palitech — šaściora. Horackuju sielskahaspadarčuju akademiju — piaciora. Mahiloŭski mašynabudaŭničy — troje. Hrodzienski ŭniviersitet imia Janki Kupały i Viciebski technałahičny — pa dvoje.
U jakaści druhoj adukacyi až 21 čałaviek skončyŭ Akademiju kiravańnia pry prezidencie. Pryčym atrymlivać adukacyju iduć ludzi, jakija ŭžo znachodziacca na vysokich pasadach. Cikava, jak adbyvałasia zdača zalikaŭ i ekzamienaŭ, naprykład, u byłoha kiraŭnika AAC Valeryja Vakulčyka ci ministra justycyi Aleha Śližeŭskaha.
Źviartaje ŭvahu, što dvoje čynoŭnikaŭ skončyli Rasijskuju akademiju dziaržaŭnaj słužby (anałah našaj Akademii kiravańnia) — Ihar Buzoŭski i ministr enierhietyki Uładzimir Patupčyk.
Ihar Buzoŭski skančaŭ rasijskuju Akademiju kiravańnia, a nie biełaruskuju.
Siarod staršyń abłvykankamaŭ papularnym źjaŭlajecca Viciebski vieterynarny instytut — jaho skončyli kiraŭniki Viciebščyny i Homielščyny Mikałaj Šarstnioŭ i Uładzimir Dvornik.
Ani asob z zachodniaj adukacyjaj, ani žančyn
Pa-raniejšamu faktyčna niama nikoha z zachodniaj adukacyjaj. Tolki Uładzimir Makiej u 1992— 1993 prachodziŭ karotkija kursy pry Aŭstryjskaj dypłamatyčnaj škole.
Ukrainskuju jurydyčnuju akademiju ŭžo za časami niezaležnaści skančvaŭ Ivan Naskievič, praŭda, pastupaŭ jon tudy jašče pa savieckaj iniercyi.
Ivan Naskievič atrymaŭ adukacyi ŭ Charkavie.
Najpaźniej vyšejšuju adukacyju atrymali vice-premjer Anatol Kalinin (34 hady) i ministr sportu Alaksandr Šamko (32).
Žančyn siarod vyšejšaha kiraŭnictva nikčemna mała — usiaho piaciora. Heta Natalla Kačanava, Maryjana Ščotkina, Lidzija Jarmošyna, Lilija Ananič i Ina Miadźviedzieva. Raniej była jašče Nadzieja Jermakova.
Siaredni čynoŭnik — Uładzimir Amaryn
Takim čynam, siaredni biełaruski čynoŭnik — heta mužčyna 54 hadoŭ, jaki skončyŭ BDU, narhas ci sielskahapadarčuju VNU, a paśla zamacavaŭ viedy ŭ Akademii kiravańnia.
Hetamu apisańniu dakładna adpaviadajuć ministr finansaŭ Uładzimir Amaryn i hienprakuror Alaksandr Kaniuk. Asoby nie samyja jarkija, ale starannyja.
Ministr finansaŭ Uładzimir Amaryn traplaje ŭ paramietry siaredniaha biełaruskaha čynoŭnika.
Hienieralny prakuror Alaksandr Kaniuk rodam z Hrodna.
* * *
Siaredni ŭzrost najvyšejšych čynoŭnikaŭ
2009 — 54,2
2011 — 54,4
2013 — 55,8
2016 — 53,7
Samy małady
2009 — Łatuška (36 hadoŭ)
2011 — Łatuška (38)
2013 — Švied i Šorac (40)
2016 — Cierachaŭ (37)
Kolkaść piensijanieraŭ
2009 — 15
2011 — 11
2013 — 21
2016 — 15
Narodžanyja nie ŭ Biełarusi
2009 — 11
2011 — 11
2013 — 9
2016 — 9
