26 śniežnia ŭstanoŭleny novy tempieraturny rekord
Paśla adnadzionnaha pierapynku ŭ Biełarusi znoŭ zafiksavanyja tempieraturnyja rekordy, paviedamlaje BiełaPAN.
26 śniežnia na značnuju častku Bresckaj vobłaści i paŭdniovy zachad Homielskaj i Hrodzienskaj abłaściej raspaŭsiudziłasia vielmi ciopłaje pavietra. U vyniku abnaviŭsia absalutny maksimum dnia. Ciapier jon składaje +12,4. Takaja tempieratura była zafiksavana ŭ Vysokim (miž tym pa prahnozie sinoptykaŭ ŭ subotu na paŭdniovym zachadzie čakałasia da plus 9).
Na astatniaj terytoryi maksimalnaja tempieratura nie pieravysiła 3-5 hradusaŭ ciapła. Pry hetym miaža pamiž ciopłymi i prachałodnymi pavietranymi masami była vielmi vuzkaj. Kali ŭ Baranavičach było 3,6 hradusa, to ŭ Ivacevičach, raźmieščanych mienš jak u 70 km, — 10,4.
27 śniežnia kantrasnyja tempieratury zachavajucca. Kali ŭ Viciebsku dniom budzie ŭžo nievialiki maroz (2-4 hradusy), to ŭ Breście pa-raniejšamu budzie ciopła (plus 6—8). Tut tearetyčna mahčyma abnaŭleńnie rekordu dni (9 hradusaŭ u 2011 hodzie).
Sajt pogoda.by prahnazuje, što ŭ noč na paniadziełak projdzie mocny śnieh, zavirucha. A ŭ noč na aŭtorak pachaładaje ŭ Minsku da minus 10.
