Kabiakoŭ: Finansavaje stanovišča «Biełšyny» niaprostaje
Finansavaje stanovišča AAT «Biełšyna» niaprostaje, adznačyŭ premjer-ministr Biełarusi Andrej Kabiakoŭ 8 krasavika padčas naviedvańnia pradpryjemstva. Pra heta paviedamiła pres-słužba ŭrada.
Heta, pavodle jaho słoŭ, u pryvatnaści «źviazana z prasiadańniem asnoŭnych rynkaŭ». Razam z tym jon stanoŭča acharaktaryzavaŭ pracu novaha kiraŭnika AAT Alaksieja Jakaŭleva. «Ja baču, što jość davier da kiraŭnictva, jany (rabotniki) razumiejuć, što robiać, a siońnia heta vielmi važna», — skazaŭ premjer-ministr.
Na jaho dumku, mnohim kiraŭnikam hetaha pakul nie chapaje. «Davoli časta kiraŭniki nie razumiejuć, što im treba rabić u karotkaterminovaj i siarednieterminovaj pierśpiektyvie, — skazaŭ Kabiakoŭ. — Pra budučyniu (2019-2020 hady) jany mohuć raskazać usio što zaŭhodna, a što datyčycca bližejšych hoda-dvuch — ujaŭleńnia asablivaha niama».
Aznajomiŭšysia z chodam madernizacyi pradpryjemstva, kiraŭnik urada adznačyŭ, što ŭ cełym pierśpiektyvy ŭ jaho dobryja. «Razam z tym, jak heta za apošni čas byvaje, my spaźniajemsia», — ličyć premjer-ministr.
Pavodle jaho słoŭ, kali b madernizacyja pradpryjemstva była zroblenaja try-čatyry hady tamu, heta było b «absalutnym papadańniem u rynak». «A ciapier prychodzicca dahaniać kankurentaŭ», — adznačyŭ jon.
Pieršym čynam havorka idzie pra vytvorčaść zvyšbujnych habarytnych šyn. Užo padrychtavany inviestycyjny prajekt, zamoŭlenaje abstalavańnie z terminami vyrabu hod i paŭtara. «Takim čynam, užo ŭ 2016 hodzie budzie zapuščana vytvorčaść zvyšbujnych habarytnych radyjalnych šyn, jakija vielmi zapatrabavanyja na suśvietnym rynku», — adznačyŭ kiraŭnik urada. Jon udakładniŭ, što «Biełšyna» vypuskaje pakul tolki zvyšhabarytnyja dyjahanalnyja šyny, zapatrabavanaść jakich nižejšaja.
Jak paviedamiŭ žurnalistam hiendyrektar AAT «Biełšyna» Alaksiej Jakaŭleŭ, u pradpryjemstva jość pakiet zamoŭ jak pa Biełarusi, tak i pa ekspartnych pastaŭkach.
Hałoŭnaja zadača, jakaja staić pierad kiraŭnictvam pradpryjemstva (pa dyviersifikacyi ekspartu), aktyŭna vykonvajecca. Dla hetaha, u pryvatnaści, śpiecyjalisty pradpryjemstva vyjazdžajuć z kamandziroŭkami ŭ asobnyja krainy, dzie pradukcyja «Biełšyny» ci prysutničała niedastatkova, ci nie prysutničała naohuł. Naprykład, vopytnyja partyi šyn pradpryjemstva ŭžo adpraŭlajucca ŭ Manholiju, Italiju, Hiermaniju, jość peŭnyja płany pa Brazilii.
«Dumaju, u bližejšaj budučyni my zmožam sama mieniej nivieliravać toj niehatyŭny ŭpłyŭ, jaki byŭ za košt padzieńnia rasijskaha i ŭnutranaha rynkaŭ», — ličyć kiraŭnik «Biełšyny».
Taksama Andrej Kabiakoŭ naviedaŭ AAT «Kirujučaja kampanija chołdynhu «Babrujskahramaš», dzie premjer-ministr byŭ prainfarmavany pra vytvorča-haspadarčuju dziejnaść chołdynhu i dalejšuju jaho pracu pa prasoŭvańni vypuščanaj pradukcyi na źniešnija rynki. Pytańnie prasoŭvańnia pradukcyi na źniešnija rynki abmiarkoŭvałasia i padčas naviedvańnia AAT «Čyrvony charčavik».
