Z 20 lutaha ŭ Biełarusi budzie dziejničać novaje praviła farmiravańnia cen
Ministerstvy handlu i ekanomiki Biełarusi parekamiendavali jurydyčnym asobam i indyvidualnym pradprymalnikam z 20 lutaha prytrymlivacca novych pravił farmiravańnia cen. Takaja infarmacyja raźmieščana na sajcie Minhandlu.
«Pry vykanańni jurydyčnymi asobami i indyvidualnymi pradprymalnikami rekamiendujemych pravił farmiravańnia (vyznačeńnia) cen, da hetych subjektaŭ nie buduć prymianiacca miery adkaznaści, praduhledžanyja pastanovaj Savieta Ministraŭ Respubliki Biełaruś ad 19 śniežnia 2014 hoda numar 1207», - skazana ŭ paviedamleńni. Pradpisańni, raźmieščanyja siońnia na sajcie Minhandlu, ustupajuć u dziejańnie z 20 lutaha i admianiajuć papiaredni sumiesny dakumient ministerstvaŭ ekanomiki i handlu ad 30 studzienia 2015 hoda.
Zhodna z novym piśmom, farmiravańnie cen na lekavyja srodki, vyraby miedycynskaha pryznačeńnia, miedycynskuju techniku ŭ aptovym i roźničnym źvionach ažyćciaŭlajecca ŭ adpaviednaści z normami ŭkaza ad 11 žniŭnia 2005 hoda numar 366 «Ab farmiravańni cen na lekavyja srodki, vyraby miedycynskaha pryznačeńnia i miedycynskuju techniku».
Pavyšeńnie adpusknych cen (taryfaŭ) vytvorcami dapuskajecca tolki na vieličyniu źmianieńnia koštu syraviny i materyjałaŭ, kamplektujučych, tary i ŭpakoŭki, jakija pastupili paśla 18 śniežnia 2014 hoda, a taksama enierhanośbitaŭ, paliva, u tym liku naftapraduktaŭ, z ulikam ich doli ŭ adpusknoj canie.
Pavieličeńnie adpusknych cen na padakcyznyja tavary mahčyma taksama na vieličyniu źmianieńnia vieličyni akcyzu z ulikam jaho doli ŭ adpusknoj canie.
Na impartujemyja tavary, jakija pastupili paśla 18 śniežnia 2014 hoda, dapuskajecca pavieličeńnie adpusknoj cany (na momant jaje farmiravańnia) nie bolš jak na pracent źmianieńnia kursa biełaruskaha rubla da valuty damovy ŭ paraŭnańni z 18 śniežnia.
Pry hetym rentabielnaść prodažaŭ pa kančatkovym finansavym vyniku nie moža pieravyšać 3 pracenty ŭ cełym pa arhanizacyi.
Pry farmiravańni cen jurydyčnymi asobami i pradprymalnikami, jakija ažyćciaŭlajuć aptovy i roźničny handal, dapuskajecca prymianieńnie handlovych nadbavak pa kankretnych vidach tavaraŭ u pamierach, što nie pieravyšajuć uzrovień pa stanie na (da) 18 śniežnia 2014 hoda (biez uliku praviedzienych u śniežni akcyjnych mierapryjemstvaŭ). Pry hetym rentabielnaść prodažaŭ pa kančatkovym finansavym vyniku nie moža pieravyšać 3 pracenty ŭ cełym pa arhanizacyi.
Płodaaharodninnuju pradukcyju sa stabilizacyjnych fondaŭ nieabchodna realizoŭvać pa roźničnych cenach (adpusknych cenach z ulikam handlovaj nadbaŭki), jakija nie pieravyšajuć ustanoŭlenyja rašeńniami abłvykankamaŭ i Minskaha harvykankama na studzień 2015 hoda.
Arhanizacyjam, jakija akazvajuć pasłuhi, pry farmiravańni taryfaŭ na ich u paviedamleńni rekamiendavana kiravacca anałahičnymi padychodami.
U piśmie adznačana, što rekamiendujemyja praviły farmiravańnia cen raspaŭsiudžvajucca na jurydyčnych asob i indyvidualnych pradprymalnikaŭ, jakija zajmajucca pradprymalnickaj dziejnaściu pa vytvorčaści abo prodažy (pastaŭcy) tavaraŭ na terytoryi Biełarusi, u tym liku rezidentaŭ SEZ. Jany taksama datyčacca subjektaŭ haspadarańnia, uklučanych u Dziaržaŭny rejestr, jakija zajmajuć daminujučaje stanovišča na tavarnych rynkach (za vyklučeńniem tych, chto zaklučyŭ pahadnieńni z antymanapolnym orhanam).
Hetyja miery prymajucca ŭ Biełarusi ŭ metach vykanańnia daručeńniaŭ kiraŭnika dziaržavy i ŭrada Biełarusi pa niedapuščeńni nieabhruntavanaha rostu cen i zabieśpiačeńni spažyvieckaha rynku nieabchodnym asartymientam tavaraŭ.
