U bližejšy čas ukrainski «Pieršy nacyjanalny» tranślavacca ŭ Biełarusi nie budzie
president.gov.ua
22 śniežnia minułaha hoda stała viadoma, što ŭ Biełarusi da kanca studzienia moža pačacca televiaščańnie ŭkrainskaha «Pieršaha Nacyjanalnaha» kanała. Adnak da hetaha času biełarusy mohuć ubačyć tranślacyju kanała tolki praz spadarožnik ci internet.
Nahadajem, 21 śniežnia ŭ čas sustrečy Łukašenki i ŭkrainskaha lidara Piatra Parašenki ŭ Kijevie była dasiahnutaja damoŭlenaść stvaryć sumiesny telekanał dźviuch krain.
A dniom paźniej ministr infarmacyjnaj palityki Ukrainy Juryj Steć, zajaviŭ, što padčas pieramovaŭ ź Ministerstvam infarmacyi Biełarusi dasiahnuta damoŭlenaść ŭ bližejšy čas ŭzhadnić i realizavać usie techničnyja i łahistyčnyja zadačy dla zapusku ŭkrainskaha viaščańnia na terytoryi našaj krainy ŭžo ŭ studzieni. «Liču, što na hetym etapie hetuju misiju efiektyŭna moža ŭvasobić «Pieršy Nacyjanalny «telekanał», — padkreśliŭ tady ministr.
Tym nie mienš praź miesiac nijakich zruchaŭ u pytańni arhanizacyi tranślacyi nie nazirajecca. «Nakolki nam viadoma, nijakija dakumienty padpisanyja nie byli, adpaviedna, pakul u praktyčnuju płoskaść hetaje pytańnie nie pieraciakło», — raspaviali 42.TUT.BY ŭ pres-słužbie «Pieršaha Nacyjanalnaha».
Toje ž samaje my pačuli ad pres-słužby Biełteleradyjokampanii: «Na dadzieny momant u nas nijakaj infarmacyi niama. Kali b było niejkaje pradpisańnie Ministerstva infarmacyi ci Administracyi prezidenta, to my b pra jaho ŭžo viedali».
Načalnik upraŭleńnia elektronnych ŚMI Ministerstva infarmacyi Uładzimir Jadrancaŭ zajaviŭ, što pakul infarmacyi pra start viaščańnia ŭkrainskaha kanała niama.