Były člen janukovickaj Partyi rehijonaŭ płanuje rekordnyja inviestycyi ŭ Biełaruś
Ukrainskaja hrupa «Kreatyŭ», jakaja naležyć deputatu Rady Stanisłavu Biarozkinu, płanuje pabudavać u hetym hodzie ŭ Homielskaj vobłaści zavod pa pierapracoŭcy soi.
Jaho košt 50 młn dalaraŭ, i hety prajekt moža stać samym bujnym układańniem ŭkrainskich inviestaraŭ u Biełaruś.
Pra toje, što ŭ Biełarusi čakajuć rekordnych inviestycyj z Ukrainy, zajaviŭ niadaŭna ambasadar u hetaj krainie Valancin Vialička. U intervju časopisu «Bankir'», raspaviadajučy pra pierśpiektyvy pryciahnieńnia srodkaŭ ukrainskich inviestaraŭ, jon vyłučyŭ mienavita prajekt «Kreatyvu».
«Siarod aktualnych prajektaŭ, zapłanavanych da realizacyi ŭ najbližejšaj pierśpiektyvie, — budaŭnictva ŭ Homielskaj vobłaści zavoda pa pierapracoŭcy soi z abjomam inviestycyj da 50 młn dalaraŭ na praciahu 2015 hoda», — adznačyŭ pasoł.
Pavodle infarmacyi «Ježiednievnika», prapracoŭka mahčymaściaŭ inviestavańnia ŭ Biełaruś uładalnikami hrupy pačałasia z abjavy ŭ 2011 hodzie biełaruskimi ŭładami piłotnaj pryvatyzacyi. Tady byŭ zaćvierdžany śpis vaśmi pradpryjemstvaŭ, ździełki pa pryvatyzacyi jakich pavinna było ažyćciaŭlać Nacyjanalnaje ahienctva inviestycyj i pryvatyzacyi pry padtrymcy Suśvietnaha banka i niezaležnych finansavych daradcaŭ. U liku vaśmi byŭ i Minski marharynavy zavod, na jaki pakłaŭ voka «Kreatyŭ». Ale kupić jaho ŭkraincam pa nieviadomych pryčynach nie ŭdałosia. U mai 2014 hoda padčas praviadzieńnia XI Homielskaha ekanamičnaha forumu pradstaŭniki hrupy «Kreatyŭ» padpisali inviestycyjnaje pahadnieńnie ab pačatku realizacyi prajekta budaŭnictva zavoda z nula. Mahutnaść pradpryjemstva, jakoje pavinna być uźviedziena ŭ 2015 hodzie, pavinna skłaści nie mienš jak 1200 ton soi ŭ sutki.
Hrupa «Kreatyŭ», jakuju ŭ 1991 hodzie stvaryŭ kiravahradziec Stanisłaŭ Biarozkin, jaki debiutavaŭ u 2013 adrazu na 22-m miescy ŭ rejtynhu ŭkrainskich miljanieraŭ (Forbes acaniŭ jaho bahaćcie ŭ 324 młn dalaraŭ), na siońnia źjaŭlajecca adnym z najbujniejšych ukrainskich ahrachołdynhaŭ. «Kreatyŭ» uvajšoŭ u top-10 najbujniejšych ahrakampanij Ukrainy pa finansavych vynikach 2013 hoda (rejtynh Ekonomika Communication Hub top-200), zaniaŭ pieršaje miesca pa vypusku nierafinavanaha i siomaje — rafinavanaha aleju, druhoje miesca — pa abjomach ekspartu aleju. Hrupa «Kreatyŭ» — druhaja va Ukrainie pa vytvorčaści marharynu.
Niepasredna biznesam ciapier kiruje syn zasnavalnika Maksim. Biarozkin-starejšy z 2011 hoda zajmajecca palitykaj. U 2011 hodzie jon staŭ deputatam Rady ad janukovickaj Partyi rehijonaŭ. U lutym minułaha hoda jon vyjšaŭ z partyi. Na daterminovyja vybary, jakija prajšli ŭ kastryčniku 2014 hoda, Biarozkin pajšoŭ jak samavyłučeniec i znoŭ pieramoh kankurentaŭ.
Dzieviać masłaekstrakcyjnych zavodaŭ kampanii vypuskajuć alej pad brendami «Sonoła», «Kum», «Masłava» dla Ukrainy i ekspartu ŭ SND, Hiermaniju, Vialikabrytaniju, AAE, Izrail. Na ekspart, na dolu jakoha prypadaje kala 70% usioj vytvorčaści, idzie niebrendziravany nierafinavany alej, jaki kuplajuć u Paŭnočnaj Afrycy, ES, Indyi i Kitai. Słaniečnikavy šrot hrupa «Kreatyŭ» pastaŭlaje ŭ ES i SND, uklučajučy Biełaruś. Pa vynikach pieršaha kvartała 2014 kampanija «Kreatyŭ-Zachad» uvajšła ŭ top-30 kampanij, jakija najbolš zarabili na dziaržaŭnych zamovach. «Kreatyŭ-Zachad» aktyŭna pracuje z chlebazavodami («Kalinkavičychlebapradukt», «Homielchlebapradukt»). Značnaja častka šrotu vykarystoŭvajecca va ŭłasnym žyviołahadoŭčym biznesie hrupy: «Kreatyŭ» — bujny ŭładalnik ziamielnaha banka va Ukrainie (kala 35 tys. ha), jamu naležać 8 elevatarnych kompleksaŭ.
Vytvorčaść sojevaha aleju i šrotu, jakuju Biarozkin płanuje pačać i ŭ Biełarusi, ličycca pierśpiektyŭnym napramkam. Hety biznes byŭ zasnavany ŭ 2008 hodzie, a zaraz pa dasiahnutych mahutnaściach (270 tys. ton baboŭ na hod) hrupa «Kreatyŭ» užo zajmaje kala 24% rynku Ukrainy. U 2012 hodzie było pierapracavana 80 tys. ton sojevych baboŭ, u 2013 — 171 tys. ton. U 2012 hodzie kampanija zrabiła 56 tys. ton sojevaha šrotu i 15 tys. ton sojevaha aleju, u 2013 hodzie — užo, adpaviedna, 120 tys. ton šrotu i 34 tys. ton aleju. Asnoŭnyja spažyŭcy aleju — krainy ES, šrotu — miascovyja žyviołahadoŭčyja haspadarki. U markietynhavym 2014/2015 hodzie sumarnyja mahutnaści chołdynhu pa pierapracoŭcy soi pavinny vyraści da 300 tys. ton.
