U biełaruski prakat vychodzić «Ciažka być boham» Hiermana-starejšaha TREJLER
27 lutaha ŭ biełaruski prakat vychodzić «Ciažka być boham» – ekranizacyja ramana bratoŭ Struhackich, apošniaja praca znakamitaha rasiejskaha režysiora Alaksieja Hiermana-starejšaha.
Pieršy raz uziacca za ekranizacyju «Ciažka być boham» Hierman chacieŭ u 1968 hodzie, adnak padziei ŭ Prazie pierakreślili samu mahčymaść źniać film pa knizie ź jaskravymi prykmietami «adlihi». U vyniku pačatak pracy nad filmam prypadaje na 1999 hod.
Hierman-starejšy za žyćcio źniaŭ ličanuju kolkaść filmaŭ, adnak jahonyja «Pravierka na darohach», «Moj siabar Ivan Łapšyn» i «Chrustaloŭ, mašynu!» stali kłasikaj adrazu pa vychadzie. «Ciažka być Boham» Hierman nazyvaŭ svajoj apošniaj pracaj.
U filma nieadnarazova źmianiałasia nazva — «Chroniki Arkanarskaj raźni», «Raźnia ŭ Arkanary» i, u vyniku, aryhinalnaja nazva apovieści Struhackich. Zdymki doŭžylisia siem hadoŭ.
Siužet filma raspaviadaje pra płanietu, žychary jakoj pa svaim uzroŭni raźvićcia znachodziacca ŭ hłuchim Siarednievieččy. Na płaniecie, zamaskiravaŭšysia pad miascovych žycharoŭ, pracujuć ziamlanie-naziralniki.
Jany imknucca «karektavać» padziei, skiroŭvajučy tubylcaŭ na šlach prahresu, adnak nie pryśpiešvajučy jaho. Ale adzin ź ziamlanaŭ, don Rumata, nie vytrymlivaje, kali ŭ Arkanary (adna z krain płaniety) źmianiajecca ŭłada: zamiest typovaha siaredniaviečnaha despata-samadura prychodzić arhanizacyja, nakštałt fašysckaj. Rumata sprabuje ŭmiašacca, bo razumieje, što heta skiruje raźvićcio Arkanara, dy i ŭsioj płaniety, u procilehły prahresu i humanizmu bok.
Ale režysior zrabiŭ akcent nie na humanistyčnych kaštoŭnaściach, jak toje było ŭ Struhackich, a na pryrodzie čałavieka i ciomnych bakach jahonaj asoby.
Film musiŭ źjavicca jašče ŭ 2008 hodzie, adnak Hierman byŭ niezadavoleny ahučkaj stužki. Hierman-starejšy nikoli nie pracavaŭ chutka, adnak stvareńnie hetaha filma pabiła ŭsie rekordy. Niekatoryja krytyki kažuć, što Hierman, užo ciažka chvory, uvohule nie chacieŭ skančać hety prajekt.
U 2013 hodzie režysior pamior. Dapracoŭvaŭ stužku syn režysiora, Alaksiej Hierman-małodšy. 1 krasavika 2013 hoda adbyŭsia pieršy pres-pakaz stužki, paśla film prezientavali na kinafiestyvali ŭ Rymie.
Film vychodzić u prakat 27 lutaha. Jaho možna budzie pabačyć i ŭ minskich kinateatrach.