Noč muziejaŭ projdzie 18 maja, akcent — na CHIII st.

Akcent mižnarodnaj akcyi «Noč muziejaŭ», jakaja pačniecca 18 maja ŭ 20.00 u Nacyjanalnym histaryčnym muziei (NHM), budzie zrobleny na 13-ch hadach roznych stahodździaŭ u historyi Biełarusi i Jeŭropy.

Na hety raz usia prahrama «Noč u muziei: historyja nie dremle!» pryśviečana čysłu 13 i «čortavamu tuzinu». Naviedvalniki zmohuć akunucca ŭ atmaśfieru Minska 1913 hoda, a, pierajšoŭšy ŭ inšuju zału, — apynucca ŭ Maskvie 1813-ha i hetak dalej.

«Śpiecyjalna dla hetaj padziei Nacyjanalny histaryčny muziej Respubliki Biełaruś padrychtavaŭ šerah interaktyŭnych prastoraŭ i «žyvych ekspazicyj».

Usio heta dazvolić naviedvalnikam być nie prosta pabočnymi naziralnikami, ale i dałučycca da žyvoha minułaha, bo historyja nie dremle! Naprykład, naviedaŭšy majstar-kłas ramieśnikaŭ, hości zmohuć spaścihnuć mastactva hančarnaj spravy, uvajšoŭšy ŭ zału, pryśviečanuju muzycy, paŭdzielničać u džazavaj impravizacyi pad kiraŭnictvam prafiesijnych muzykantaŭ, a taksama pakinuć śled u historyi, adlustravaŭšy svajo pasłańnie dla naščadkaŭ na śpiecyjalnym «pałatnie historyi», — paviedamlaje ekspazicyjna-vystavačny adździeł NHM.

Na vystavie «Kamunalnaja kvatera № 13» hości ŭ režymie anłajn mohuć panazirać za žyćciom jaje nasielnikaŭ, pryčym kožny žadajučy zmoža zhulać z žycharami kvatery ŭ damino.

U miežach ekspazicyi «Historyja Biełarusi XVI–XVIII st.st. u partretach i hieraldycy» možna budzie adlustravać siabie ŭ estetycy sarmackaha partreta. Na praciahu ŭsioj «Nočy muziejaŭ» u załach buduć pracavać džazavyja kalektyvy. Haściej čakaje interaktyŭnaja hulnia «12 kresłaŭ + 1», a taksama spartyŭnaja hulniovaja prahrama dla dziaŭčat, pryśviečanaja 13 lipienia 1908 hoda, kali ŭpieršyniu da ŭdziełu ŭ Alimpijskich hulniach byli dapuščanyja žančyny.

Dla tych, chto pryjdzie ź dziećmi, budzie arhanizavana hulniovaja placoŭka na vulicy, aformlenaja ŭ stylistycy 1913 hoda.

Tam možna budzie zaniacca sumiesnaj dziciača-darosłaj tvorčaściu, pahulać u papularnyja hulni tych hadoŭ, zrabić siamiejnaje fota. Asablivym hościem «Nočy ŭ muziei» budzie viadomy biełaruski stylist Alaksandr Kiryniuk sa svajoj vystavaj-pakazam, padrychtavanaj śpiecyjalna da hetaj akcyi. A ŭ dvoryku muzieja budzie ŭstanoŭlena letniaja scena, na jakoj budzie prachodzić vystupleńnie šmatlikich artystaŭ. Usio heta razam z zajmalnymi konkursami i pryzami ad viadučaj abiacaje jarkaje i vidoviščnaje mierapryjemstva.

Košt uvachodnaha bileta — 40 tysiač rubloŭ.

Dla naviedvalnikaŭ, jakija naradzilisia 13-ha čysła, uvachod biaspłatny. Aficyjnymi partniorami «Nočy muziejaŭ — 2013» vystupajuć kampanii Japan Tobacco International i Majsternia padziej SOL

BiełaPAN

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH