Siońnia — Dzień milicyi
Dzień milicyi ŭ Biełarusi śviatkujuć 4 sakavika.Takaja data była ŭstanoŭlena ŭkazam Alaksandra Łukašenki ad 1998 hoda.
Čamu mienavita ŭ hety dzień? Tamu što 4 sakavika 1917 hoda zahadam cyvilnaha kamiendanta horada Minska Michajłaŭ Michaił Alaksandravič (pa pašpartnych źviestkach, a sapraŭdnaje imia — Michaił Vasiljevič Frunze) byŭ pryznačany časovym načalnikam milicyi Usierasijskaha Ziemskaha Sajuza pa achovie paradku ŭ horadzie Minsku.Takim čynam balšavik pranik u siłavyja struktury novaj Rasii paśla Lutaŭskaj revalucyi.
Vyvodzić svoj radavod ad orhanaŭ achovy pravaparadku, jakija isnavali ŭ Vialikim Kniastvie Litoŭskim i Rečy Paspalitaj, biełaruskaja milicyja nie rašyłasia. Zrešty, jany sapraŭdy nie nazyvalisia milicyjaj.
U Rasii dzień supracoŭnika orhanaŭ unutranych spravaŭ (tam ciapier palicyja, a nie milicyja) adznačajecca 10 listapada, jak i ŭ saviecki čas, i adličvajecca ad času stvareńnia milicyi paśla Kastryčnickaj revalucyi. Va Ukrainie dzień milicyi adznačajecca 20 śniežnia, u dzień pryniaćcia Viarchoŭnaj Radaj Zakona ab milicyi ŭ 1991 hodzie.
Staŭleńnie da palicyi i milicyi krytyčnaje va ŭsich krainach, dzie nizkaja zakonapasłuchmianaść hramadstva.U Biełarusi da hetaha dabaŭlajucca pretenzii da pravaachoŭnikaŭ za ich suŭdzieł u pieraśledzie hramadzian za palityčnyja pohlady. Naprykład, sumnuju viadomaść nabyli masavaje pryciahnieńnie inšadumcaŭ da administratyŭnaj adkaznaści nibyta za «niecenzurnuju łajanku» ci «chulihanstva». Pry hetym supracoŭniki milicyi vymušany łžeśviedčyć u sudach. Takoje «ŭžyvańnie» milicyi padryvaje pavahu da zakona i pravaśviadomaść achoŭnikaŭ paradku.
Pry ŭsim pry hetym treba pamiatać, što mienavita milicyja vyrašaje tysiačy štodzionnych prablem hramadzianaŭ, dbaje pra biaśpieku i pilnuje, kab naša supolnaść hruntavałasia nie na «pravie mocnaha», a na roŭnaści ŭsich pierad zakonam.
Hetyja tradycyi milicyi nieśli hienierał Zacharanka, hienierał Hryb, hetyja tradycyi praciahvajuć tysiačy šarahovych i niešarahovych sumlennych milicyjantaŭ. Ich uvasableńniem staŭ padpałkoŭnik Mikałaj Kazłoŭ, uzor sapraŭdnaha milicyjanta.
