Ałkajeŭ sustrakaŭsia ź Sivakovym u Minsku? - videa

U Internecie źjaviłasia videa, na jakim pa Minsku jedzie były načalnik SIZA№ 1 Aleh Ałkajeŭ.

Jedzie jon na aŭtamabili pa praśpiekcie Niezaležnaści ŭ bok aeraporta. I vyrazna nazyvaje siabie: «Ja Aleh Leanidavič Ałkajeŭ».

Infarmacyja pra toje, što Ałkajeva bačyli ŭ Minsku, źjaviłasia ŭ sacyjalnych sietkach niekalki dzion nazad.

Sam jon nie paćviardžaŭ i nie abviarhaŭ hetaj infarmacyi. Videa źjaviłasia na JUTubaŭskim kanale hramadskaj inicyjatyvy «Naš dom», jakuju ŭznačalvaje Volha Karač.

Ałkajeŭ atrymaŭ palityčny prytułak u Niamieččynie paśla taho jak vykryŭ fakty, źviazanyja z vykradańniem i imaviernym zabojstvam lidaraŭ apazicyi, biznesoŭcaŭ i žurnalistaŭ u kancy 1990-ch.

Jon prykłaŭ vializnyja namahańni dla taho, kab raskryć hetyja złačynstvy i painfarmavać hramadskaść pra ich.

Varta adznačyć, što 16 listapada ŭ intervju hazecie «Priessboł» były ministr unutranych spravaŭ Juryj Sivakoŭ zajaviŭ, što niasie vinu za źnikłych palitykaŭ.

Na pytańnie žurnalista «U čym vas najbolš paprakajuć?» Juryj Sivakoŭ skazaŭ nastupnaje: «Napeŭna, luby ćviarozy čałaviek, jaki sa mnoju nikoli nie sustrakaŭsia, a viedaje pra Sivakova tolki na słych, źviazvaje hetaje proźvišča sa źnikłymi palitykami. Nu što ž… Ja za heta adkazvaju, maja vina ŭ hetym była, jość i budzie. Čas, viadoma, prachodzić, niešta źnikaje, ale ludzi ŭsio adno buduć stavicca da mianie jak da čałavieka braniabojna-tupahałovaha, hatovaha ščoŭknuć abcasami i vykanać luby zahad».

Aleh Ałkajeŭ adrazu zreahavaŭ na hetuju zajavu Sivakova i nazvaŭ jaje sihnałam dla zamiežnych palitykaŭ:

«Jahonuju zajavu možna ličyć sihnałam da zamiežnych palitykaŭ, jakija zmohuć harantavać jaho biaśpieku, a taksama namiokam na toje, što z hetaha momantu lubyja zamachi na jahonaje žyćcio ci svabodu ciapier treba razhladać tolki jak srodak pazbavicca ad važnaha śviedki. Ja dumaju, što palitykam treba ŭličyć hety faktar i sapraŭdy padumać pra dapamohu hetamu čałavieku. Ja viedaju, što dla jaho heta byŭ ciažki vybar, ale i caniu toje, što jon znajšoŭ u sabie siły zrabić pravilny krok».

Paźniej Aleh Ałkajeŭ u intervju "Našaj Nivie" paćvierdziŭ, što byŭ u Minsku. Jon zajaviŭ, što pravioŭ u stalicy Biełarusi čas z 11 da 13 listapada. Vychodzić, pryjezd Ałkajeva ŭ Biełaruś papiaredničaŭ dadzienaj zajavie Sivakova.

NN.BY

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH