Аман — Беларусь — 0:4
Буйной перамогай скончыўся апошні сёлета матч для каманды Бернда Штанге.
Для лістападаўскай таварыскай гульні зборнай Беларусі па футболе месца было выбранае досыць спецыфічнае — Аман. Гэта можа тлумачыцца хіба толькі тым, што наш трэнер немец Бернд Штанге некалі трэніраваў гэтую зборную, але беспаспяхова.
Кажуць, што быў варыянт прыняць у Мінску Уругвай, але ў апошні момант прагарэў. Ну то дарога на Аравійскі паўвостраў. Дарэчы, у гэтым рэгіёне гуляць беларусам ужо даводзілася: двойчы з Аб’яднанымі Арабскімі Эміратамі (перамога і пройгрыш) і аднойчы — з Саудаўскай Аравіяй (нічыя).
У сталіцы Амана Маскаце зараз «прахалода» — усяго толькі каля 30 градусаў цяпла. Ды і мора побач. Сапраўдны рай для футбалістаў.
Перад гульнёй наша каманда не далічылася цэлы шэраг лідараў. Траўмаваныя Кутузаў, Жаўноў, Пуціла. Трэнер незадаволены станам гульні Аляксандра Глеба і Карніленкі. Затое нечакана ў заяўку трапіў малады Палякоў з «Шахцёра».
Планавалася, што матч пачнецца а палову на пятую па беларускім часе. АНТ нават запланаваў паказ. Але потым пачатак перанеслі на дзве гадзіны наперад. Ну а трансляцыю па ТБ нікуды пераносіць не захацелі. Глядзіце, беларусы, у запісу.
Ужо ў самым пачатку матча стала ясна, што ўяўляе наш супернік. На дзесятай хвіліне гульні гаспадары безнадзейна гарэлі — 0:2. Прычым, галы забіў не які‑небудзь наш суперфорвард (хаця ці ёсць такія?), а цэнтральны абаронца Аляксандр Мартыновіч.
Гулец з сонечнага «Краснадара» раней за зборную не забіў увогуле, а тут адзначыўся цэлым дублем. Прычым, абодва разы да ўзяцця варот прыводзілі стандарты — штрафны і вуглавы.
У другой палове тайма першага на бліскучы пас Цімоха Калачова адгукнуўся Вячаслаў Глеб — 0:3. Гульню можна лічыць было зробленай.
Другі тайм быў адзначаны мноствам заменам. З’явіўся на полі і той самы дэбютант Палякоў.
Вось так зборная Беларусі сапсавала настрой аманскім аматарам футболу перад заўтрашнім юбілеем султана Кабуса.
Наўрад ці была вялікая мэтазгоднасць такога выезду. Хіба што набралі некалькі лішніх пунктаў для рэйтынгу. Лепш бы суперніка было знайсці ў Еўропе.
Наступную гульню зборная, найхутчэй, правядзе ў лютым. Апанент яшчэ не вызначаны. Не выключана, што гэта будзе Расія. Ну а потым 26 сакавіка чарговы матч адборачнага турніру да Еўра‑2012 з Албаніяй.
