«Расследаванне вядзецца па лініі ФСБ». У расійскім МЗС пракаментавалі справу Фядуты, Кастусёва і Зянковіча
У расійскім МЗС пракаментавалі справу Фядуты, Кастусёва і Зянковіча. Расследаванне вядзецца па лініі ФСБ, але цяжка ўявіць, каб такія акцыі арганізоўваліся без ведама спецслужбаў ЗША. Аб гэтым заявіла афіцыйны прадстаўнік МЗС Расіі Марыя Захарава, паведамляюць РИА Новости.
— Расследаванне вядзецца па лініі ФСБ Расіі, таму не ў нашай кампетэнцыі гаварыць аб падрабязнасцях, тым больш апярэджваць гэта расследаванне, рабіць высновы аб дачыненні да плануемага, па сутнасці, акта дзяржаўнага тэрарызму ўладаў ЗША — гэта будзе прадметам расследавання, безумоўна, — адзначыла Захарава. — Хоць, вядома, цяжка сабе ўявіць, каб акцыі падобнага маштабу арганізоўваліся без ведама амерыканскіх спецслужбаў. Тым больш мы ведаем, як фігурантаў гэтай справы кансультавалі ў заходніх сталіцах.
Нагадаем, 17 красавіка стала вядома аб затрыманні Фядуты, Зянковіча і Кастусёва, якія, як сцвярджае КДБ, нібыта рыхтавалі дзяржаўны пераварот і замах на Лукашэнку і яго дзяцей.
