Намеснік міністра Казакевіч назваў сацыяльны партрэт чалавека, «звязанага з пратэстнай актыўнасцю»
У краіне было здзейснена больш за 2,5 тысячы злачынстваў, «звязаных з пратэстнай актыўнасцю». Тысяча супрацьпраўных дзеянняў была праведзена ў дачыненні да супрацоўнікаў міліцыі або ўнутраных войскаў. Устаноўлены восемсот чалавек, якія «так ці інакш удзельнічалі ў пратэсным руху». Такая інфармацыя прагучала ў эфіры тэлеканала «Беларусь 1», піша Tut.by.
— Я думаю, гледачу будзе цікава пачуць, што мы склалі сацыяльны партрэт такога злачынцы. Гэта непрацуючы мужчына ва ўзросце ад 18 да 35 гадоў. Альбо які працуе на нейкай нізкааплатнай пасадзе. І на пытанне, а мы кожнаму задаём гэтае пытанне: «Што цябе падштурхнула пагражаць, добра міліцыянту — у нас такая прафесія рызыкоўная — жонцы міліцыянта, дзецям міліцыянта? Навошта ты гэта робіш?» — гучыць шаблонны адказ: «Такім чынам я выказваю сваю грамадзянскую пазіцыю», — распавёў намеснік кіраўніка МУС Генадзь Казакевіч.
Па словах Казакевіча, грамадзянскую пазіцыю трэба выказваць на выбарчым участку або ва ўстаноўленым законам парадку.
— Але ўсё, што звязана з пагрозамі, з абразай, непрыхаваным інфармацыйным ціскам, безумоўна, будзе спыняцца — заявіў ён.
Нагадаем, у студзені ў адзін з навінавых сюжэтаў БТ трапіла міліцэйская статыстыка — «сацыяльна-ўзроставы партрэт асоб, затрыманых за ўдзел у несанкцыянаваных масавых мерапрыемствах». Згодна з гэтай статыстыкай, больш за 56% пратэстоўцаў — асобы ва ўзросце ад 30 да 60 гадоў. Сярод іх беспрацоўных — 19%, працуючых — амаль 53%, пенсіянераў — 22%.
