МУС не паведаміла дакладнай лічбы затрыманых учора. Усяго ж іх ужо больш за 13 тысяч
Фота Надзеі Бужан
МУС не паведаміла дакладнай лічбы затрыманых у Беларусі за палітыку ўчора. «Усяго за мінулыя суткі па краіне затрымана звыш 350 чалавек да разгляду ў судзе спраў па адміністрацыйных правапарушэннях», — гаворыцца ў паведамленні МУС.
Між тым праваабаронцы-вясноўцы маюць імёны 380 затрыманых учора як мінімум у 20 населеных пунктах краіны: ад Мінска праз Міханавічы і Беразіно да Оршы.
Як правіла, праваабаронцы няздольныя ўлічыць усіх затрыманых, калі іх колькасць такая вялікая, і рэальная колькасць большая за іх статыстыку.
Такім чынам, усяго ў Беларусі за час прэзідэнцкай кампаніі і пратэстаў супраць фальсіфікацыі выбараў адбылося, як мінімум, каля 13 210 затрыманняў.
«Наша Ніва» атрымала гэтую лічбу, сплюсаваўшы звесткі Міністэрства ўнутраных спраў за асобныя дні ад пачатку пратэстаў. У тыя дні, калі звесткі МУС былі меншыя, чым спісы праваабаронцаў па прозвішчах, або не публікаваліся, мы ўключалі лічбу, сабраную праваабаронцамі.
Пікам затрыманняў сталі 9-12 жніўня, калі, згодна са звесткамі МУС, затрымалі «больш за» 6700 чалавек (дакладных лічбаў за тыя дні МУС не прадаставіў, а праваабаронцы былі няздольныя падлічыць, затрыманняў было зашмат).
Затрыманых у Беларусі за гэтае лета больш, чым было інтэрнавана ў Польшчы часоў «Салідарнасці». Там за перыяд ваеннага становішча былі інтэрнаваныя 10 123 чалавекі.
Каб людзі ў іншых краінах маглі ўявіць сабе маштабы ў Беларусі, у праекцыі на колькасць насельніцтва, дадзеная колькасць затрыманняў адпавядае прыкладна 205 000 у прапорцыі да насельніцтва Расіі, 60 000 — для Польшчы ці Украіны.
У кожным разе, гэта найбольшы хапун у найноўшай гісторыі Беларусі.
