Хворы на каранавірус акцёр памёр ад «неўдакладненай пнеўманіі»
Такі дыягназ засведчаны ў даведцы, якую сваякам памерлага Віктара Дашкевіча выдалі ў лякарні. У пасведчанні аб смерці ў адпаведнай графе — толькі шыфр з лацінскіх літар і лічбаў, паведамляе «Радыё Рацыя».
Віктар Мікалаевіч Дашкевіч, 75-гадовы акцёр Віцебскага акадэмічнага драматычнага тэатра імя Якуба Коласа, заслужаны артыст Беларусі, памёр у лякарні ўначы з 30 на 31 сакавіка. У медычную ўстанову ён трапіў 21 сакавіка з дыягназамі «пнеўманія» і «хранічная абструктыўная хвароба лёгкіх», падчас лекавання яму двойчы рабілі тэст на наяўнасць каранавіруса, і другі з тэстаў паказаў станоўчы вынік. Сваякі не выключаюць, што каранавірус ён «падхапіў» у агульнай палаце, куды шпіталізавалі ўсіх хворых з сімптомамі пнеўманіі. Пасля таго як Віктару Дашкевічу стала горш, яго перавялі ў рэанімацыйнае аддзяленне і падлучылі да апарата штучнай вентыляцыі лёгкіх. Але выратаваць яго не ўдалося.
