Работніцу Лепельскага МКК не сталі штрафаваць за пастаянныя адказы па-руску на беларускамоўныя лісты
«Я пісала зварот у Лепельскі малочна-кансервны камбінат, каб з’явілася беларуская мова на прадукцыі. Мне адказалі па-руску, ды яшчэ і на цалкам рускамоўным бланку»,— кажа прадстаўніца кампаніі «Умовы для мовы» Аліна Нагорная, сяброўка Ігара Случака.
Гэта быў ужо трэці рускамоўны адказ. Пасля гэтага Нагорная напісала заяву ў райвыканкам: маўляў, ствараюцца перашкоды ў выкарыстанні беларускай мовы, прашу прыняць меры. Адтуль заява пайшла ў суд.
У выніку прыцягнулі да адказнасці супрацоўніцу МКК Вольгу Дзівіну. Суд Лепельскага раёна разглядзеў справу 27 сакавіка.
Прычым, цікава, што Ігар Случак дапамог Дзівінай парадай.
«Дзівіна напісала яму ва «Укантакце», прычым па-беларуску, скардзілася на тое, што на яе падалі заяву. І «дзякавала за штраф». А Ігар параіў ёй як зменшыць штраф». Мэта ж не пакараць чалавека, а каб прадпрыемства перастала дыскрымінаваць беларускую мову», — кажа Нагорная.
Случак параіў Вользе прызнаць віну, каб выканкам вынес ёй мінімальны штраф — 4 базавыя велічыні, бо звычайна пакаранне ў судзе больш суворае.
Праўда, Дзівіна гэтай парадай не скарысталася. А суд скончыўся тым, што ў яе дзеяннях не знайшлі складу адміністратыўнага правапарушэння.
«Па маёй інфармацыі, на працы Вользе зрабілі вымову, прычым зрабіла кіраўніцтва з Віцебска. І цяпер бланкі прыводзяць у парадак. Але адказ прадпрыемства нязменны: яны не могуць дадаць беларускую мову на этыкетку «па эканамічных прычынах», — кажа Аліна Нагорная.
«Наша Ніва» звязалася з Вольгай Дзівінай, тая кінула слухаўку. Начальніца Дзівінай, кіраўніца юрыдычнага аддзела Лепельскага МКК Юлія Македонава сказала, што лічыць немэтазгодным адказваць на пытанні.
