Чырвоныя рукі Пушкіна ацанілі ў 63 рублі

Фота: Мінск-Навіны.

Актывісту Піліпу Шаўрову, якога затрымалі пасьля таго, як у студзені ён пафарбаваў рукі помніка Пушкіну, выставілі канчатковае абвінавачаньне і вызначылі нанесеную шкоду, піша Радыё Свабода.

Пра гэта жонка актывіста Вольга паведаміла са спасылкай на адваката. Яна сказала, што справа складаецца з трох эпізодаў, яго абвінавачваюць паводле двух артыкулаў Крымінальнага кодэксу. Якія гэта эпізоды?

1. Пафарбаваў у чырвонае рукі помніка Пушкіну.
2. Намаляваў бел-чырвона-белы сьцяг на помніку загінулым пры выкананьні доўгу міліцыянтам і вайскоўцам унутраных войскаў МУС Беларусі. За гэтыя дзьве правіны абвінавачаны ў хуліганстве. Максымальнае пакараньне — да 2 гадоў пазбаўленьня волі.
3. Нанёс графіці «Свабоду Севярынцу». Абвінавачаны ў апаганьваньні і порчы маёмасьці. Максымальнае пакараньне — да 3 месяцаў арышту.

Сума шкоды — 230 рублёў

Вольга Шаўрова паведаміла, што ўжо аплаціла нанесеную Піліпам шкоду

• за помнік Пушкіну — 62 рублі 88 капеек,
• за помнік міліцыянтам — 67 рублёў 87 капеек,
• за графіці «Свабоду Севярынцу» — 98 рублёў 18 капеек.

Агулам — 228 рублёў 93 капейкі.

Зь яе словаў, муж па-ранейшаму ў ізалятары на вуліцы Валадарскага, меру стрыманьня яму не зьмянілі.

Радыё Свабода

Хочаш падзяліцца важнай інфармацыяй
ананімна і канфідэнцыйна? Пішыце рэдактару
«Нашай Нівы» ў ТГ

0

0

0

0

0

0