Інтэрнэт абураецца: у Гомелі дырэктарка забрала дошку з класа. Што ж там адбылося? ВІДЭА
У інтэрнэце з'явілася відэа, на якім відаць, што ў класе гомельскай школы адсутнічае дошка.
Жанчына за кадрам тлумачыць, што дошку загадала зняць дырэктарка школы. За тое, што бацькі адмовіліся збіраць грошы на новую дошку.
«Наша Ніва» датэлефанавалася да дырэктара школы № 25 Ніны Клязовіч, каб тая растлумачыла, што ж адбылося ў школе.
«Мне дзіка, што гэты выпадак атрымаў такі рэзананс. Сітуацыя была наступная. Я ўчора зайшла ў кабінет, дзе займаюцца першакласнікі. Убачыла, што адзін цвік ад дошкі ледзьве трымаецца, тырчыць. Падумала, што гэта небяспечна, загадала дошку зняць, цвікі прыбіць. Дошку знялі ўчора, сёння з раніцы прыйшла мама аднаго з вучняў, убачыла, што дошкі няма і запісала гэта відэа. Відэа запісвалася ў 7:40, у 9:30 дошка вісела на месцы», — запэўнівае Ніна Клязовіч.
Больш за ўсіх, расказвае дырэктарка, у гэтай сітуацыі разгубілася настаўніца пачатковых класаў.
«Яна сёлета толькі скончыла педагагічны каледж, на відэа відаць, што яна аж разгубілася, не ведала, што адказаць той маме. Я дырэктар ужо 18 гадоў, але такі выпадак у мяне ўпершыню. Ну чаму нельга было падысці да мяне?» — пытаецца дырэктарка.
Ніна Клязовіч расказвае, што да сённяшняга «кіпешу» ў класе не ўздымалася пытанне наконт дошкі.
«Дошка вісела карычневая, у драўлянай акантоўцы. На ёй добра ўсё было бачна, добра пісалася. Ну раз хочуць бацькі новую, пойдзем насустрач. Замовім зялёную, у акантоўцы з «нержавейкі»,— тлумачыць Ніна Клязовіч.
Дырэктарка ўдакладняе, што новая дошка з'явіцца ў першакласнікаў 19 снежня. Яе замовяць на пазабюджэтныя сродкі.
