За нелегальны гандаль у Мінску прапанавалі штрафаваць на суму да 100 базавых
Рабочая група па барацьбе з нелегальным гандлем правяла пасяджэнне, дзе абмяркоўваліся захады па выкараненні гэтай з'явы ў горадзе, перадае карэспандэнт агенцтва «Мінск-Навіны».
Прадпрымальнікі і прадстаўнікі розных дзяржаўных ведамстваў разглядалі праблему ў розных плоскасцях. З боку прадпрымальнікаў прагучала такая прапанова: месцы, дзе гандлююць нелегалы, выставіць на аўкцыёны. Каб тут з'явіліся прадпрымальнікі, якія гатовыя працаваць сумленна.
Таксама прапаноўвалася павялічыць колькасць пунктаў для размяшчэння латкоў, кіёскаў для продажу гародніны, садавіны і іншай прадукцыі.
Акрамя таго, міліцыя прапанавала ў аддзелах гандлю раённых адміністрацый увесці ў штат 2-3 супрацоўнікі, якія займаліся б толькі праблемай нелегальнага гандлю: хадзілі ў рэйды па стыхійных пунктах, складалі пратаколы на гандляроў.
Падчас дыскусіі прагучала ідэя адпраўляць даныя нелегальных гандляроў у падаткавую інспекцыю. Там іх дзеянні будуць кваліфікаваныя як незаконная прадпрымальніцкая дзейнасць. У гэтым выпадку прадугледжаны штраф да 100 базавых велічынь (2550 рублёў). Бо цяпер у дачыненні да парушальнікаў толькі складаюць адміністрацыйны пратакол са штрафам 12,75 рубля.