Кіраўнік Мінска расказаў, што прымае рашэнні з улікам каментароў у інтэрнэце
Карэспандэнт «Нашай Нівы» паразмаўляў з кіраўніком Мінска Анатолем Сіваком у кулуарах «Мінскага дыялога».
Мы спыталіся, якія праблемы горада здаюцца яму асноўнымі, той указаў на камунальныя пытанні, назваўшы іх «дошкай ганьбы»: у асобных раёнах перапоўненыя садкі і школы, недзе ёсць неакультураныя зялёныя і жылыя зоны.
«У бліжэйшыя тры гады пабудуем 20 новых установаў адукацыі», — запэўніў ён.
«Я вось чытаю каменты пра сябе і пра гарадскую палітыку ў інтэрнэце. І ўспрыманне гэтай крытыкі рознае: ёсць цікавы канструктыў, а ёсць проста абразы. Канечне, любыя дзеянні ты карэктуеш з улікам меркавання людзей. І тут момант, што вось калі ўказваюць на праблемы, то я нават недзе пасміхаюся, бо, далібог, магу пералічыць гэтых праблем больш, чым хто з каментатараў. І канечне ведаю, дзе і што патрабуе рашэння. А вось хай бы яны лепш давалі талковыя парады адразу, як тое ці іншае зрабіць лепш, танней — прапаноўвалі, а не толькі крытыкавалі!» — сказаў Сівак.
Таксама ён паразважаў пра турызм.
«Мы не імкнемся зрабіць Мінск падобным да нейкага іншага горада. Троху вось турыстаў у нас паболела, калі верыць статыстыцы. Ёсць праблема, што ў горадзе аб'ектыўна не склалася з нейкай старадаўняй забудовай, цікавымі музеямі, архітэктурай.
Я вось недзе вычытаў паняцце «тусовачны турызм», можа, нават у вас. Вось гэта шанец!
Пра яго актыўна гавораць месяцы тры, накірунак здаецца цікавым. І тыя міжнародныя падзеі, якія праходзяць у Мінску, яму спрыяюць. Я не хачу сказаць «давайце больш Зыбіцкіх пабудуем і турыст пацягнецца», але гэта адно з аднаго вынікае. Напэўна, у бліжэйшы час са спецыялістамі разбярэмся, якія месцы Мінска маглі б стаць нашымі турыстычнымі фішкамі, пакуль недастаткова распіяранымі», — дадаў кіраўнік Мінска.
