Лукашэнка: Прэзідэнт Украіны — патрыёт сваёй краіны, мы яго падтрымліваем
Прэзідэнт Украіны Уладзімір Зяленскі — сапраўдны, цвёрды чалавек, патрыёт сваёй краіны, гатовы да цяжкіх рашэнняў для дасягнення міру. Пра гэта Аляксандр Лукашэнка Беларусі заявіў, выступаючы на форуме «Мінскі дыялог», піша Tut.by.
Ён нагадаў, што некалькі дзён таму вярнуўся з Жытоміра, дзе праходзіў форум рэгіёнаў.
— З прэзідэнтам Уладзімірам Зяленскім мы мелі грунтоўную размову па шырокім коле тэм. Я адчуў, што прэзідэнт Украіны — сапраўдны, цвёрды чалавек, патрыёт сваёй краіны. Абсалютна нармальны палітык, які гатовы вырашыць гэтую праблему. Ён гатовы да цяжкіх рашэнняў для дасягнення міру. І мы ў гэтым яго падтрымліваем, — заявіў Лукашэнка.
Ён дадаў: у Беларусі рады, што ў працэсе па дасягненні міру на ўсходзе Украіны з'явіўся прагрэс — прайшоў абмен палоннымі, падпісана «формула Штайнмаера».
— Але калі нехта думае, што лёд крануўся, то не. І ён не зрушыцца, калі мы не падштурхнём працэс. Чаму? Бо мы гэтага Зяленскага, якога загрузілі гэтым страшным грузам, пакінулі сам-насам з гэтымі праблемамі. Паглядзіце, што робіцца ў Кіеве, новую ўладу хочуць прыціснуць. Толькі камяні з усіх бакоў кідаюць у гэтага маладога чалавека. І калі гэтая «Нармандская чацвёрка» чагосьці вартая, то даўно трэба было сабрацца ёй і вырашаць. Але там нічога не вырашаюць, я быў у гэтым працэсе, я ведаю, як гэта. Пры гэтым я свайго меркавання не хаваю: без удзелу ЗША канфлікт ва Украіне ўрэгуляваць не атрымаецца, — заявіў Лукашэнка.
