У Барысаве завялі крымінальную справу на прызыўніка-ўхіліста. Ён трапіўся другі раз
Крымінальную справу на 25-гадовага жыхара Барысава завялі за ўхіленне ад прызыву на вайсковую службу, паведамляе міліцыя.
У лістападзе мінулага года ён быў выкліканы ў ваенкамат, дзе пад роспіс атрымаў позву для праходжання медыцынскай камісіі і неабходнасці прыбыцця ў лютым у ваенны камісарыят. Аднак ва ўказаны ў позве дзень малады чалавек так і не з'явіўся, вырашыўшы ўхіліцца ад вайсковай службы.
Прычым дадзенае злачынства барысавец зрабіў другі раз. У 2016 годзе малады чалавек ужо парушаў патрабаванне Закона «Аб вайсковым абавязку і вайсковай службе», не з'явіўшыся ва ўстаноўленыя тэрміны ў ваенкамат. Тады суд аштрафаваў яго на 1 840 рублёў.
У цяперашні час праводзяцца следчыя дзеянні, накіраваныя на ўстанаўленне ўсіх абставінаў здзейсненага злачынства.
