За 25 гадоў з Расіі вывелі $750 мільярдаў
У 1994-2018 гадах з Расіі былі выведзеныя актывы, агульны кошт якіх цяпер можа перавышаць $1 трыльён, падлічылі эксперты Bloomberg. Зрэшты, яны зрабілі таксама больш кансерватыўную ацэнку ў $750 мільярдаў, удакладняючы, што даходнасць выведзеных у афшоры актываў можа быць не занадта высокай.
«[Нават у гэтым выпадку] агульная сума па-ранейшаму велізарная — толькі крыху меншая за 50% ВУП [краіны]. Укладзеныя ў айчынную эканоміку, гэтыя актывы маглі б знізіць кошт капіталу, павялічыць аб'ёмы вытворчасці і даходы ўрада ад падаткаў, якія можна выдаткаваць на развіццё інфраструктуры і сацыяльныя праграмы», — адзначаецца ў артыкуле Bloomberg.
Паводле Банка Расіі, чысты адток капіталу па выніках 2018 года вырас у 2,7 раза ў гадавым вымярэнні — з $25,2 мільярда да $67,5 мільярда. За студзень-люты 2019 года чысты вываз капіталу з Расіі прыватным сектарам склаў $18,6 мільярда, што ў 2,1 раза перавысіла паказчык першых двух месяцаў папярэдняга года ($8,7 мільярда).
