Схему руху ў раёне закрытых пуцеправодаў на МКАД могуць перагледзець
ДАІ рэкамендуе аўтааматарам пазбягаць руху па МКАД у гадзіны пік у сувязі з рэканструкцыяй пуцеправодаў на 3-м і 25-м км, паведаміў сёння журналістам намеснік начальніка мінскага ДАІ Андрэй Зыранаў.
У раёне рамонту маставых збудаванняў арганізавана дзяжурства супрацоўнікаў Дзяржаўтаінспекцыі для аператыўнага рэагавання на дарожную абстаноўку. «На МКАД адзначаюцца значныя затрымкі руху транспарту, фіксуем 3-5 дарожна-транспартных здарэнняў у дзень. Яны нязначныя, пацярпелых у аварыях няма, але кожны з іх яшчэ больш пагаршае сітуацыю», - адзначыў Андрэй Зыранаў.
Заторавыя сітуацыі таксама назіраюцца і ў іншых раёнах горада - па Партызанскім праспекце, вул. Казінца, Кіжаватава. У лютым пасля ацэнкі транспартных патокаў у схему руху могуць унесці змены.
