На курсы ўкраінскай мовы ў Мінску запісалася 80 чалавек
У пятніцу ў Мінску пачаўся другі сезон курсаў украінскай мовы. Тры групы займаюцца ў двух памяшканнях:
18.00 — у Рэспубліканскім цэнтры нацыянальных культур (Чычэрына, 19) — група пачаткоўцаў
18.00 — у Таварыстве беларускай мовы (Румянцава, 13) — група пачаткоўцаў
19.30 — у Таварыстве беларускай мовы (Румянцава, 13) — група тых, хто працягвае вывучаць мову. Большасць студэнтаў тут ходзяць другі год.
Пачаткоўцы пачалі з вывучэння літар і вітанняў, студэнты-другакурснікі — з практыкаванняў па націску і вуснага задання ў малых групах: абмяркоўвалі прафесіі і заробкі.
Цяпер на курсах трое выкладчыкаў: філолаг і журналіст з Украіны Аксана Ціпліцька, беларускі філолаг-украініст з украінскімі каранямі Вольга Барысенка і Ягор Дзёбык, беларускі філолаг-украініст, які цяпер выкладае беларускую мову ў Луцку ва Усходнееўрапейскім універсітэце імя Лесі Украінкі. Вольга і Ягор будуць чаргавацца.
Выкладчыкі працуюць на валанцёрскіх пачатках.
«Групы дастаткова вялікія, і людзі ўсё яшчэ запісваюцца, у наступную пятніцу далучацца і новыя студэнты. Таму, канечне, хацелася б падзяліць групы, — кажуць арганізатары. — Але для гэтага трэба яшчэ адзін выкладчык. Мы яго актыўна шукаем».
Пачаткоўцы расказалі, што прывяло іх на курсы. Нехта мае ўкраінскія карані і хоча ведаць мову продкаў. У некага знаёмыя ва Украіне («Калі мае ўкраінскія сябры вывучылі беларускую мову, мне стала сорамна, таму я сёння і прыйшоў», — падзяліўся студэнт-гістфакавец). Камусьці ўкраінская патрэбная для работы. Большасць, аднак, проста хоча адчуваць сябе ў сваёй талерцы, калі бывае ва Украіне: «Хачу размаўляць з украінцамі на іх мове».
Група пачаткоўцаў з Цэнтра нацыянальных культур. Студэнтаў вітае пасол Украіны
Адкрыццё групы для пачаткоўцаў у Рэспубліканскім цэнтры нацыянальных культур. Ансамбль хору ўкраінскай песні «Крыніца» праспяваў «Ой зелене жито зелене, хорошиї гости у мене». Ансамбль спявае цудоўна, але ўкраінская музыка зараз перажывае такі росквіт, што на афіцыйных мерапрыемствах з поўным правам можа гучаць і «Акіян Эльзы», і песні гурту «KAZKA». Яны слухаліся б не менш чароўна, але прэзентавалі б Украіну больш сучасна.
Пасол прывітаў выкладчыцу пані Вольгу, якая трошкі спазнілася: «Я выбачаюся, што ўзяў слова без Вашага дазволу, я пасол Украіны, часам дазваляю сабе такую вольнасць».
Другакурснікі ў ТБМ. Фота Святланы Каваленка.
Курсы скончыліся а 21-й. Дзяжурных у ТБМе ўжо не было. Праводзіць студэнтаў і зачыніць офіс прыйшла старшыня ТБМ і дэпутатка Палаты прадстаўнікоў Алена Анісім.
