Адказнасць за «п'яныя» аварыі хочуць узмацніць
У Беларусі прапрацоўваецца пытанне ўзмацнення крымінальнай адказнасці за «п'яныя» аварыі з цяжкімі наступствамі. Пра гэта на 28-м пасяджэнні Каардынацыйнай рады генеральных пракурораў дзяржаў — удзельніц Садружнасці Незалежных Дзяржаў заявіў генпракурор Беларусі Аляксандр Канюк.
Канюк распавёў аб працы пракуратуры па супрацьдзеянні кіраванню транспартнымі сродкамі ў стане алкагольнага ап'янення і адзначыў, што бяспека дарожнага руху — адзін з прыярытэтаў унутранай палітыкі беларускай дзяржавы.
Паводле яго слоў, прапрацоўваюцца ў цяперашні час змяненні ў крымінальны закон: усталяванне мінімальнага і павелічэнне максімальнага тэрміну пакарання ў выглядзе пазбаўлення волі за «нецвярозае» кіраванне з цяжкімі наступствамі і прымяненне безальтэрнатыўнага пяцігадовага тэрміну пазбаўлення права кіравання транспартным сродкам.
«Прыняцце такіх мер дасць магчымасць замацаваць станоўчыя тэндэнцыі ў сферы бяспекі дарожнага руху, знізіць колькасць правапарушэнняў і злачынстваў, звязаных з п'янствам за рулём, паменшыць колькасць ДТЗ па віне нецвярозых вадзіцеляў і пацярпелых у іх людзей», - запэўніў Аляксандр Канюк.