Міністр аховы здароўя ўзяў пад асабісты кантроль лячэнне ўкраінскіх дзяцей, якія трапілі ў аварыю пад Камянцом
Фота: gaibrest.by
Брыгады беларускіх медыкаў з Мінска і Брэста выехалі сёння раніцай у Камянецкі раён для аказання дапамогі дзецям, якія пацярпелі ў аварыі на трасе «Камянец—Шарашова—Свіслач», перадае прэс-служба Міністэрства аховы здароўя.
У аварыі пацярпелі дзеці з украінскай каманды па футболе. Адно дзіця загінула, яшчэ шасцёра дзяцей з цяжкімі траўмамі былі дастаўлены ў Камянецкую цэнтральную раённую бальніцу. Ва ўсіх пацярпелых дыягнаставаны чэрапна-мазгавыя траўмы рознай ступені цяжкасці, а таксама пераломы і вывіхі. Адно дзіця знаходзіцца ў цяжкім стане і падлучана да апарата штучнай вентыляцыі лёгкіх.
Міністр аховы здароўя Валерый Малашка узяў сітуацыю пад асабісты кантроль. «Лепшыя дактары Беларусі і ўсе неабходныя матэрыяльна-тэхнічныя рэсурсы задзейнічаны для аказання дапамогі пацярпелым у аварыі дзецям», — сказаў ён.
З Брэста ў Камянец прыбыла брыгада медыкаў. У яе складзе — нейрахірург, траўматолаг, рэаніматолаг і іншыя спецыялісты, а з Мінска ў Камянец — дзіцячы траўматолаг, нейрахірург і дзіцячы анестэзіёлаг-рэаніматолаг. У Брэст накіраваўся першы намеснік міністра аховы здароўя Дзмітрый Піневіч. Сёння частку пацярпелых дзяцей перавядуць у Брэсцкую абласную бальніцу.
Аварыя адбылася сёння, 13 мая, каля 7-й гадзіны, на 54 кіламетры аўтадарогі Р-98 ля вёскі Мартынюкі, паведаміла УДАІ Брэсцкай вобласці.
Кіроўца за рулём аўтамабіля «Рэно Майстар» сутыкнуўся з пагрузчыкам Амкадор, якім кіраваў мясцовы жыхар. Загінуў хлопчык 2005 года нараджэння, грамадзянін Украіны, які знаходзіўся на пярэднім пасажырскім сядзенні.
Чытайце таксама: Хлопчык з Украіны загінуў у аварыі з мікрааўтобусам і трактарам у Камянецкім раёне
