На месцы «Чырвонай зоркі» на Кальварыйскай збіраюцца будаваць вялікі басейн за кітайскія грошы
Каля станцыі метро «Маладзёжная» плануюць пабудаваць басейн міжнароднага стандарту. Праект часткова прафінансуе Кітай. Але для гэтага трэба знесці будынак друкарні «Чырвоная зорка», паведамляе TUT.BY.
У ліпені 2017 года стала вядома, што Кітай можа даць грошай на будаўніцтва нацыянальнага футбольнага стадыёна і басейна міжнароднага стандарту ў Мінску. Тады гаворка ішла пра суму ў 180 мільёнаў даляраў.
Далей у інвестпраграме Мінска на 2018 год з'явіўся артыкул выдаткаў на будаўніцтва басейна міжнароднага стандарту ў раёне Кальварыйскай. Ужо ў гэтым годзе на падрыхтоўку тэрыторыі і праекта выдзеляць 10 мільёнаў рублёў з бюджэту.
Як паведамілі TUT.BY работнікі друкарні «Чырвоная зорка», якая падпарадкоўваецца Міністэрству інфармацыі, басейн збіраюцца будаваць на месцы іх прадпрыемствы ў першым Загарадным завулку, 3. Для гэтага трэба зносіць будынак і перасяляць друкарню ў іншае месца.
Скрыншот з карты «Яндэкс»
Гэтую інфармацыю пацвердзілі і суразмоўцы партала ў дзяржаўных органах. Праўда, па іх словах, прэзідэнт пакуль не падпісаў адпаведны ўказ.
— Наколькі я ведаю, там было некалькі рэдакцый [указа], але пакуль ён не падпісаны, — кажа інфармаваная крыніца.
Па словах іншага суразмоўцы ў дзяржорганах, працаўнікі «Чырвонай зоркі» занепакоіліся сваёй будучыняй і пісалі лісты ў розныя інстанцыі.
Па словах супрацоўнікаў, «Чырвоную зорку» рэарганізуюць і далучаюць да Паліграфкамбіната імя Якуба Коласа, які таксама належыць Мінінфарму. Работнікам прапануюць працаўладкаванне там жа. Адны пагаджаюцца, другія — не. Галоўная прычына заключаецца ў размяшчэнні Паліграфкамбіната — на Каржанеўскага.
Як вынікае з адказу Міністэрства інфармацыі на калектыўны зварот работнікаў «Чырвонай зоркі», будаўніцтва басейна запланавана менавіта тут па рашэнні кітайскага боку. Згодна з праектам указа прэзідэнта, «Чырвоную зорку» трэба адсяліць з Загараднага завулка да 1 чэрвеня.
