Убачыла пад падушкай кашалёк і не стрымалася: у бальніцы ў 84-гадовай жанчыны скралі грошы
У Вілейскі РАУС звярнулася 84-гадовая жанчына і паведаміла, што ў бальнічнай палаце ў яе скралі 55 рублёў.
Па словах пацярпелай, на ноч яна клала кашалёк пад падушку.
— Раніцай жанчына прачнулася, пералічыла грошы і недалічылася 55 рублёў, — распавёў «Рэгіянальнай газеце» Аляксандр Путырскі, намеснік начальніка Вілейскага РАСК.
Падчас праверкі супрацоўнікі міліцыі пачалі падазраваць, што грошы скрала 43-гадовая мясцовая жыхарка, якая ляжала з пацярпелай у адной палаце. Падчас допыту падазраваная ўвесь час блыталася ў паказаннях і ўрэшце прызналася ў крадзяжы.
Жанчына сказала, што ноччу, калі суседка па палаце заснула, яна ўзяла з-пад падушкі кашалёк, выцягнула 55 рублёў і паклала яго на ранейшае месца. Пацярпелая спала і нічога не пачула, — распавёў Аляксандр Путырскі.
