Каля халоднай зоркі знойдзена вельмі падобная да Зямлі планета
Навукоўцы выявілі 15 новых планет, на адной з якіх можа быць вада і жыццё. Яны круцяцца вакол чырвоных карлікаў — зорак, у некалькі разоў меншых і халаднейшых за Сонца. Даследаванне апублікаванае ў часопісе The Astronomical Journal.
Ілюстрацыйны малюнак
Усе гэтыя экзапланетныя сістэмы выявіў касмічны апарат Kepler. Самы яркі з чырвоных карлікаў — K2-155 — размешчаны за 200 светлавых гадоў ад Зямлі.
Навукоўцы мяркуюць, што на паверхні экзапланеты, якая атрымала назву K2-155d, можа быць вада, прычым у вадкім выглядзе. Такую выснову даследчыкі зрабілі дзякуючы камп'ютарнаму мадэляванню на аснове дадзеных «Кеплера» і наземных тэлескапічных назіранняў. Згодна з камп'ютарнай сімуляцыяй, на K2-155d можа быць атмасфера, а кліматычныя ўмовы на ёй могуць быць падобныя на зямныя.
Цяпер неабходна правесці больш дакладныя даследаванні, вызначыць памер і тэмпературу планеты. Для гэтага спатрэбіцца задзейнічаць больш складаныя методыкі вымярэння гэтых параметраў.
Акрамя гэтага, астраномы даследавалі залежнасць памеру планет зорнай сістэмы ад колькасці металу ў зорцы. Лічыцца, што чым больш яго ў зорцы, тым большы памер планет, што круцяцца вакол яе. Новыя дадзеныя пацвердзілі гэтую гіпотэзу. Самая буйная планета з знойдзеных (яе радыус ў тры разы перавышае радыус Зямлі) круціцца вакол зоркі з найбольшым утрыманнем металу.
