Tesla паказала свой першы беспілотны электрагрузавік і новы спорткар
Tesla прадставіла свой першы электрычны грузавік і новую легкавік — спорткар з адкідным верхам. Кіраўнік кампаніі Ілан Маск заявіў, што стварэнне электрагрузавіка стала чарговым крокам на шляху да вызвалення эканомікі ад выкарыстання паліва на вуглевадародах.
Электрагрузавік Tesla Semi Truck зможа праехаць без падзарадкі да 800 км, а для таго, каб праехаць яшчэ каля 650 км, яму хопіць усяго паўгадзіннай зарадкі, сцвярджае Маск. Пры максімальнай загрузцы ў 36 тон Semi Truck можа разагнацца да 100 км/г за 20 секунд, а без грузу — усяго за пяць.
Tesla Semi Truck абсталяваны сістэмай аўтапілота, пры якой грузавікі змогуць самастойна рухацца ў аўтакалонах, дзе толькі першай машыне спатрэбіцца кіроўца. Гэта, вядома, зробіць грузаперавозкі таннейшымі.
Вытворчасць электрагрузавіка плануюць пачаць у 2019 годзе. Кошт пакуль невядомы.
Пасля прэзентацыі грузавіка была таксама прадстаўленая новая легкавая мадэль Tesla Roadster — паўнапрывадны спартыўны аўтамабіль з адкідным верхам.
На ім можна разагнацца да 100 км/г менш, чым за дзве секунды, а яго максімальная хуткасць — 400 км/г. Без падзарадкі Roadster здольны праехаць да тысячы кіламетраў.
Тысяча першых Tesla Roadster будуць каштаваць 200 тысяч даляраў. Продажы пачнуцца ў 2020 годзе.
Амерыканская кампанія Tesla Motors — вытворца электрамабіляў прэміум-сегменту, акумулятараў і сонечных батарэй. Была заснаваная ў 2003 годзе і лічыцца заканадаўцам моды ў электрычным аўтамабілебудаванні.
