Літоўскім кандытарам забаранілі выпускаць цукеркі «Чырвоны каптурок»
Літоўская кандытарская фабрыка Naujoji Rūta не зможа больш выпускаць цукеркі пад гандлёвым знакам Krasnaja Šapočka («Чырвоны каптурок»), пастанавіў суд.
Віленскі акруговы суд 3 кастрычніка задаволіў скаргу маскоўскай кандытарскай фабрыкі «Чырвоны Кастрычнік» і забараніў Naujoji Rūta выкарыстоўваць гэты гандлёвы знак, паведамляе Delfi.
«Слоўны элемент гандлёвага знака пазоўніка і адказчыка вымаўляюцца аднолькава, таму з'яўляюцца фанетычна ідэнтычнымі. У суда не ўзнікла сумненняў у тым, што значная частка грамадства ў Літве без цяжкасцяў разумее рускую мову і здольная прачытаць як рускія словы, так і такія ж словы, напісаныя лацінскімі літарамі, і па гэтай прычыне аднолькава іх вымаўляць», — гаворыцца ў пастанове суда.
Naujoji Rūta вырабляе гэтыя цукеркі для гамбургскай кампаніі Dovgan. Літоўскія суды таксама разглядаюць спрэчку «Чырвонага Кастрычніка» і Naujoji Rūta з нагоды цукерак Miška kosolapyj («Мішка касалапы»).
