Хлопец, які абяцаў «рэзаць беларускіх патрыётаў», аказаўся тролем з Расіі
Фота з таго самага трэнінгу з удзелам Мільчакова, куды прыехалі беларусы
На мінулым тыдні шэраг беларускіх сайтаў перадрукаваў інтэрв’ю з Антонам Сегавым, які паабяцаў «рэзаць жыўцом свядомых ура-патрыётаў у РБ». Чалавек прадставіўся беларусам, які вучыўся стральбе і тактыцы ў расійскага баевіка і неанацыста Дзмітрыя Мільчакова.
Няўжо ў нашай краіне ёсць прыхільнікі «рускага міру», гатовыя да вайны, калі «Расія дасць ім сігнал»? А менавіта так Антон Сегаў адказаў журналістам. Пры гэтым ён запэўніваў, што беларускія спецслужбы такіх, як ён, падтрымліваюць і не прыцягваюць да адказнасці.
«Еўрарадыё» паспрабавала адшукаць Антона Сегава і праверыць гэтую інфармацыю.
Перш-наперш выходзім на магілёўца Дзмітрыя М., які сапраўды ў сярэдзіне кастрычніка ездзіў на трэніроўкі да Мільчакова ў Расію.
Антон Сегаў сцвярджае, што зрабіў гэта сэлфі ў жніўні 2016 года
«Я не ведаю, хто такі Антон Сегаў, — разводзіць рукамі крыніца.
Высвятляецца, што Сегаў — досыць актыўны ў сацсетках. Яго любімы занятак — «ваяваць» з украінцамі і беларусамі, якія не падтрымліваюць «рускі мір».
У некаторых суполках Антон сцвярджае, што жыве ў Харкаве. У некаторых, што ў Беларусі.
Адзін з пастоў Антона Сегава, дзе ён выстаўляе сябе харкаўчанінам
Ёсць у Антона слабасць — камп'ютарныя гульні. Яго любімыя мянушкі — «мега-донат» і «Отходняк». Некалькі гадоў таму IT-журналіст Аляксей Ткачук браў у Антона Сегава інтэрв’ю. Журналіст прадаставіў «Еўрарадыё» перапіску.
«Я Антон з нафтавай сталіцы Расіі горада Ніжневартаўска. У рэальным жыцці я інжэнер-праграміст на газаперапрацоўчым заводзе», — вось як наш герой прадстаўляецца журналісту.
Аказваецца, Антон Сегаў — сапраўднае імя. Яму 26, сапраўды жыве ў Ніжневартаўску.
У 2012 годзе хлопец у пошуках працы пакінуў рэзюмэ на адным з папулярных маскоўскіх сайтаў. І распісаў там, што скончыў у сваім горадзе школу №4 (як аказалася, усяго 9 класаў), што працаваў рознарабочым ды адміністратарам у камп'ютарным клубе, любіць інтэрнэт-гульні.
Пасля гісторыі з інтэрв’ю беларускім СМІ Антон выдаліў сваю старонку, таму звязваемся з яго малодшым братам Данілам Сегавым, які цяпер праходзіць тэрміновую службу ў расійскай дэсантуры недалёка ад Ніжневартаўска.
«Давайце ўсё згладзім. Ён бухае, яшчэ да таго ж хварэе, прыступы бываюць, не разумее, што піша. Неадэкват!» — сцісла апісвае брат.
Самому Антону Сегаву пішам з фэйкавага акаўнта і прадстаўляемся беларускімі ваеннымі. «Баявік» ідзе на кантакт. Падчас гутаркі тлумачыць прычыну, чаму выдаў сябе за беларуса, які «чакае сігналу, каб рэзаць ура-патрыётаў»:
«Была славесная перапалка з адным беларусам у суполцы «ДШРГ Русіч». Пасля гэтага мне напісаў журналіст. На эмоцыях, каб вые….ца, вырашыў адказаць у стылі, што я беларус».
— А калі вы ў апошні раз былі ў Беларусі?
— Гадоў пяць мне было, быў яшчэ малы.
У дадатак да гэтага Антон Сегаў кажа, што ніколі не служыў у войску, працуе ў Ніжневартаўску ў сферы нафтаздабычы, не мае нічога супраць беларускай мовы, бо яе не ведае.
