Беларускі фільм «Самотны востраў» трапіў на Маскоўскі кінафестываль

Беларускі фільм упершыню ад 1985 года ўключаны ў асноўную конкурсную праграму 34-га Маскоўскага міжнароднага кінафестывалю, які пройдзе ў расійскай сталіцы ад 21 да 30 чэрвеня. Строгі папярэдні

адбор прайшла знятая на «Беларусьфільме» сумесная праца беларускіх, латышскіх і эстонскіх кінематаграфістаў «Самотны востраў».

Апошні раз беларускі кінематограф быў прадстаўлены ў асноўным конкурсе прэстыжнага фестывалю карцінай Элема Клімава «Ідзі і глядзі», якая заваявала ў 1985 годзе галоўны прыз.

Фільм «Самотны востраў» будзе дэманстравацца ў конкурснай праграме Маскоўскага кінафестывалю 25 чэрвеня. Да гэтага ён ужо быў прадстаўлены на закрытым паказе падчас Канскага кінафестывалю, дзе атрымаў станоўчыя водгукі крытыкаў.

Усяго

ў асноўны конкурс Маскоўскага кінафестывалю ўключана 17 стужак, створаных кінематаграфістамі Кітая, Венгрыі, Ірана, Вялікабрытаніі, Італіі, Польшчы, Ірана, Фінляндыі

і іншых краін. Расію прадставяць фільмы Аляксандра Прошкіна «Орда» і Рэнаты Літвінавай «Апошняя казка Рыты». Па выніках конкурсу будуць уручаны прызы «Святы Георгій» — за лепшы фільм, рэжысуру, жаночую і мужчынскую ролі, а таксама спецыяльны прыз журы.

Акрамя асноўнага конкурсу ў рамках фестывалю пройдуць конкурсы «Перспектывы», кароткаметражных і дакументальных фільмаў, а таксама мноства спецыяльных фестывальных праграм. Усяго за дзесяць дзён кінафоруму ў Маскве пакажуць некалькі сотняў карцін.

БелТА

Хочаш падзяліцца важнай інфармацыяй
ананімна і канфідэнцыйна? Пішыце рэдактару
«Нашай Нівы» ў ТГ