Бальшыня беларусаў ня хоча класьціся пад танкі за Расею
Незалежная сацыялёгія падкінула бярэмя цікавых лічбаў. Піша Аляксандар Класкоўскі.
Пад 70% беларусаў лічаць, што незалежнасьць ужо адбылася. Адносная бальшыня суайчыньнікаў перакананая, што яны ад гэтага выйгралі. На гіпатэтычным рэфэрэндуме аб уступленьні нашае краіны ў Эўразьвяз галасы падзяліліся б фактычна пароўну. І гэтак далей...
Сапраўды, незалежная сацыялёгія падкінула бярэмя цікавых лічбаў.
Зарэгістраваная ў Вільні ўстанова прафэсара Манаева абнародавала вынікі апытаньня, праведзенага на мяжы кастрычніка — лістапада.
Заяву пра гатоўнасьць беларусаў класьціся пад танкі, каб засланіць Маскву, афіцыйны лідар зрабіў, калі памятаеце, 29 верасьня на сустрэчы з расейскімі журналістамі.
Гэты экспартны варыянт братэрскага піяру агучваецца ня першы раз. І пэўна ж робіць чаканае эмацыйнае ўзьдзеяньне на ўсходніх суседзяў.
Але вось зандаж айчыннае грамадзкае думкі паказаў, што 51,4% такога самаахвярнага абяцаньня не ўхваляюць. Яшчэ 10,8% адказалі, што ім гэта абыякава (то бок у акопы за Расею, мякка кажучы, таксама ня рвуцца). Падтрымалі заяву толькі каля чвэрці рэспандэнтаў.
Робяць уражаньне і іншыя вынікі дасьледаваньня. Пераказваю тэзава:
— праціўнікаў пабудовы АЭС у нас значна болей, чым прыхільнікаў;
— болей за 60% беларусаў — за тое, каб замежнікам дазвалялі ўсынаўляць беларускіх сіротаў;
— пэрспэктыва дарагога газу пакуль не спарадзіла апакаліптычных настрояў, але разам з тым 53,3% згодныя, што гэта будзе адначаць разрыў дачыненьняў, ва ўсякім разе эканамічных, з Масквою;
— 58,3% адказалі, што ім бліжэйшыя эўрапейцы і амэрыканцы, і толькі 11,3% — што кітайцы, пэрсы ды вэнэсуэльцы.
Кожны вынік можна камэнтаваць вельмі доўга, і, магчыма, мы яшчэ да гэтых лічбаў вернемся.
Пакуль жа, па гарачых сьлядох, напрошваецца выснова, што рэальныя настроі ў нашым грамадзтве шмат у якіх парамэтрах зусім не дапасуюцца да афіцыйнай лініі і разыходзяцца з прапагандысцкімі вэктарамі.
Так што пэсымісты іншым разам пэўна ж перавялічваюць цяжар саўковае спадчыны ды ступень замбаванасьці паспалітага люду.
Прыкра толькі, што на гіпатэтычным рэфэрэндуме аб уступленьні Беларусі ў ЭЗ, калі б ён ладзіўся сёньня, праціўнікаў аказалася б на 0,2% болей, чым як прыхільнікаў далучэньня да адзінай Эўропы.
Зь іншага боку, задача для нашай апазыцыі не такая ўжо і пякельна складаная! Хіба агітацыйнага таленту апанэнтаў рэжыму ня хопіць, каб заваяваць гэтыя 0,2%? :)
Тым болей што і ўлада іншым разам падгульвае — акурат дзеля "эўрапейскіх паказчыкаў"... :)
P.S. Болей падрабязныя зьвесткі апытаньня ляжаць тутака.