Макей: Мы гатовыя ўдзельнічаць у перагаворным працэсе па Украіне
«Беларусь спадзяецца на дыпламатычнае вырашэнне расійска-ўкраінскага канфлікту і гатовая аказаць максімальнае садзейнічанне для палягчэння перамоў паміж бакамі», — заявіў міністр замежных спраў Беларусі.
Пра гэта заявіў кіраўнік МЗС Беларусі Уладзімір Макей у інтэрв'ю Цэнтральнаму тэлебачанню Кітая, паведамілі на СТБ.
У Беларусі расійская і ўкраінская дэлегацыі правялі ўжо тры раўнды перамоў — пакуль без асаблівага поспеху.
«У чым заключаецца наша роля? Мы не з'яўляемся бокам перамоваў, хоць мы не сыходзім ад адказнасці і гатовыя ўдзельнічаць у перагаворным працэсе і ўнесці свой уклад у вырашэнне сітуацыі, калі нас пра гэта папросяць і калі ў гэтым будзе неабходнасць. Цяпер мы сканцэнтраваныя на тым, каб аказваць максімальнае садзейнічанне абодвум дэлегацыям, якія знаходзяцца на тэрыторыі Беларусі. Мы стараемся стварыць зручную лагістыку, мы забяспечваем усім неабходным з пункту гледжання арганізацыйна-тэхнічнага. Натуральна, важныя пытанні лагістыкі, стварэння камфортных умоў для працы — забеспячэння сувяззю», — распавёў Макей.
