На заводзе ў ЗША сапсавалі 15 млн доз вакцыны Johnson & Johnson
Супрацоўнікі завода амерыканскай кампаніі Johnson & Johnson у Балтыморы некалькі тыдняў таму дапусцілі памылку пры змешванні інгрэдыентаў вакцыны ад каранавіруса, што прывяло да страты 15 млн доз прэпарата, паведамляе газета The New York Times.
Пра страту 15 млн доз прэпарата праз вытворчую памылку на заводзе ў Балтыморы таксама піша Bloomberg са спасылкай на крыніцы. Паводле агенцтва, інцыдэнт адбыўся на прадпрыемстве Emergent BioSolutions Inc, якое яшчэ не было сертыфікавана Упраўленнем па пытаннях якасці харчавання і медыкаментаў (FDA) для вытворчасці вакцыны Johnson & Johnson.
У Johnson & Johnson заявілі, што партыя лекавага рэчыва не прайшла праверку якасці. «Падчас працэсу кантролю якасці на прадпрыемстве Emergent BioSolutions была выяўленая адна партыя лекавай субстанцыі, якая не адпавядала стандартам», — паведаміў прадстаўнік кампаніі Джэйк Сарджэнт.
Як піша NYT, FDA праводзіць праверку завода. Усе партыі вакцыны кампаніі, якія ўжо паступілі ў медыцынскія ўстановы ЗША, бяспечныя, бо былі зроблены на магутнасцях Johnson & Johnson у Нідэрландах, аднак наступныя партыі прэпарата планавалася накіроўваць з завода ў Балтыморы, што прывядзе да затрымкі паставак з-за прастою ў сувязі з праверкай, адзначае газета.
