Лукашэнка спадзяецца на «хуткае вяртанне двухбаковага дыялогу» з Літвой
Пра гэта гаворыцца ў віншаванні, скіраваным народу Літвы з нагоды Дня Незалежнасці краіны.
«Гісторыя мірнага суіснавання нашых народаў налічвае некалькі стагоддзяў. Беларусы заўсёды паважалі права сваіх суседзяў на вызначэнне шляху самастойнага развіцця. Наша добрасуседства спрадвеку захоўвалася дзякуючы народнай дыпламатыі, трывалым гуманітарным і гаспадарчым сувязям», — цытуе віншаванне БелТА.
Лукашэнка адзначыў, што, нягледзячы на ўсе супярэчнасці, Мінск па-ранейшаму зацікаўлены ў далейшым паглыбленні кантактаў з Вільняй па лініі рэгіёнаў, прадпрыемстваў і ўстаноў: «Для хуткага вяртання двухбаковага дыялогу ў канструктыўнае рэчышча неабходна як мага больш эфектыўна выкарыстоўваць вялікі патэнцыял супрацоўніцтва ў розных галінах. Упэўнены, што сумесная праца будзе служыць пабудове даверу і адпавядае чаканням жыхароў абедзвюх краін».
Літва сярод першых не прызнала афіцыйныя вынікі прэзідэнцкіх выбараў у Беларусі ў жніўні і ўвяла санкцыі супраць лукашэнкаўцаў.